სამართალი
ექიმების დაუდევრობით მცირეწლოვანი ბავშვი გარდაიცვალა
თბილისის მესამე პედიატრიულ საავადმყოფოში წლინახევრის საბა ფორჩხიძე გარდაიცვალა, რომელიც ჭიათურიდან მენინგოენცეფალიტის დიაგნოზით ჩამოიყვანეს. ექიმების თქმით, თბილისის საავადმყოფოში მოთავსებისას ბავშვი შოკურ მდგომარეობაში იყო და კლინიკაში მიყვანიდან ერთ დღეში გარდაიცვალა.
გარდაცვლილის ოჯახის წარმომადგენლები მომხდარში ექიმებს ადანაშაულებენ, რომლებმაც, მათი განმარტებით, ბავშვის მდგომარეობა არასათანადოდ შეაფასეს. ბავშვის დედამ საბას მართვით სუნთქვაზე გადაყვანა მოითხოვა, თუმცა კლინიკაში განუცხადეს, რომ აპარატი არ მუშაობდა, რასაც ექიმებიც ადასტურებენ და განმარტავენ, რომ აპარატი სხვა კლინიკიდან მოითხოვეს, თუმცა უკვე დაგვიანებული აღმოჩნდა.ოჯახის მესვეურებმა ჯანდაცვის სამინისტროში ექიმების – დავით ფერაძისა და პაატა ნემსაძის, წინააღმდეგ საჩივარი უკვე შეიტანეს. ისინი საქმის გამოძიებას და ექიმთა პასუხისმგებლობის განხილვას ითხოვენ. შესაბამისმა კომისიამ განცხადების შესწავლა უკვე დაიწყო.
