საქართველო, 21 აპრილი, საქინფორმი. მტკიცებულებების წარმოდგენა, საქმისათვის მსვლელობის მიცემა, ანუ ის პროცესი რომლითაც სახელმწიფო უზრუნველყოფს მართლმსაჯულების აღსრულებას, მათ უბრალოდ ფეხზე დაიკიდეს, - ასე ეხმაურება საზოგადოებრივი მოძრაობის „ხალხის ძალა“ წევრი, თამთა მეგრელიშვილი კელი დეგნანის განცხადებას სამი მოქმედი და ერთი ყოფილი მოსამართლის სანქცირებასთან დაკავშირებით.

მეგრელიშვილის თქმით, ამ საკითხზე ქართული მხარის მიერ მტკიცებულებათა მოთხოვნის გადასაფარად, ამერიკული მხარის მხრიდან მხოლოდ გაკვრით გაკეთდა განცხადება, რომ მათ ჩაატარეს ძალიან საფუძვლიანი მიმოხილვა, შეაგროვეს ინფორმაცია, რომლის დიდი ნაწილი არის საჯაროდ ხელმისაწვდომი და მიიღეს დასანქცირების გადაწყვეტილება.

„აშშ-ის სახელმწიფო მდივნის, ენტონი ბლინკენის განცხადებით აშშ-მა მოსამართლეებს მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს, მნიშვნელოვან კორუფციულ საქმიანობაში მათი ჩართულობის მოტივით, სანქციები დაუწეს. აღნიშნული მოსამართლეების დასანქცირება ეფუძნება არა ფაქტებს, არამედ საელჩოს და საკუთრივ, კელი დეგნანის წარმოდგენებს ამ მოსამართლეებზე.

ქართული მხარის არგუმენტირებული მოთხოვნა საკითხის ირგვლივ წარმოდგენილ იქნეს მყარი, დადასტურებული მტკიცებულებები, საელჩოს მხრიდან უპასუხოდ დარჩა. ქართული მხარის მიერ მტკიცებულებათა მოთხოვნის გადასაფარად, მათი მხრიდან მხოლოდ გაკვრით გაკეთდა განცხადება, რომ მათ ჩაატარეს ძალიან საფუძვლიანი მიმოხილვა, შეაგროვეს ინფორმაცია, რომლის დიდი ნაწილი არის საჯაროდ ხელმისაწვდომი და მიიღეს დასანქცირების გადაწყვეტილება. ანუ საკითხზე „საფუძვლიანი“ მიმოხილვის დროს საელჩოს არ გახსენებია ქართულ მხარესთან, აუცილებელი ურთიერთობა, ქართული სახელმწიფოს ამ პროცესში ჩართვის აუცილებლობა.

მტკიცებულებების წარმოდგენა, საქმისათვის მსვლელობის მიცემა, ანუ ის პროცესი რომლითაც სახელმწიფო უზრუნველყოფს მართლმსაჯულების აღსრულებას, მათ უბრალოდ ფეხზე დაიკიდეს.

საელჩომ ამ პროცესში არ ცნო ურთიერთთანამშრომლობის ფორმატი და მხოლოდ მის მიერ მოსამართლეთა დასანქცირების შემდეგ მოუწოდა ხელისუფლებას, გამოიძიოს მის მიერ წარმოდგენილი ბრალდებები საქართველოს კანონმდებლობის შესაბამისად. ეს არის ქართული სახელმწიფოს დაცინვა, მართლმსაჯულების პრინციპებზე ფეხით გადავლა, ქართული კანონის დაკნინება.

ძვირფასო ელჩო, ჩვენ არ ვართ კოლონია, ვიმსახურებთ კანონზე კანონით საუბარს და ეს უნდა გესმოდეთ“, - მიმართავს კელი დეგნანს თამთა მეგრელიშვილი.