როგორც პრეზიდენტის პრესსპიკერმა მანანა მანჯგალაძემ დღეს გამართულ ტრადიციულ ბრიფინგზე განაცხადა, კონგრესმენებისა და პრეზიდენტ სააკაშვილის შეხვედრაც სწორედ ბათუმში შედგება. „ეს იმ ინტენსიური კონსულტაციების რეჟიმის გაგრძელებაა, რომელიც აშშ-სა და საქართველოს შორის არსებობს. განსახილველი საკითხების სპექტრი საკმაოდ მრავალფეროვანია და როგორც სავაჭრო, ისე პოლიტიკურ და რეგიონის უსაფრთხოების საკითხებს მოიცავს, რაც ძალზე მნიშვნელოვანი თემაა“, – განაცხადა მანჯგალაძემ.

ამასთან, დღესვე, 15:00 საათზე, კონგრესმენები ბათუმის „შერატონში“ ქართული ოპოზიციის წარმომადგენლებსაც შეხვდებიან. ოპოზიციური „ექვსეულის“ ლიდერები კახა შარტავა, ირაკლი ალასანია და დავით უსუფაშვილი ამერიკელ კონგრესმენებს ხელისუფლების მიერ შეთავაზებულ საარჩევნო ცვლილებებსა და მათზე საკუთარ პოზიციებს გააცნობენ.

მოგვიანებით ამერიკელ კონგრესმენთა დელეგაციას საქართველოს უშიშროების საბჭოს მდივანი გიგა ბოკერია შეხვდება. შეხვედრა 16:00 საათზე დაიწყება და მას, სავარაუდოდ, გიგა ბოკერიას მოადგილე ბათუ ქუთელიაც დაესწრება.