საქართველო, 31 მარტი, საქინფორმი. რუსეთში ჩატარებული 2020 წლის მოსახლეობის აღწერის თანახმად, როგორც ეთნიკურად ქართველების, ისე საქართველოში დაბადებული და 2010 წლიდან რუსეთში მცხოვრები პირების რაოდენობა მნიშვნელოვნად შემცირდა.

სტატისტიკური მონაცემების თანახმად, 113 687 პირი იდენტიფიცირებულია როგორც ეთნიკური ქართველი და რუსეთში მცხოვრები; აქედან, 3 045 საქართველოს მოქალაქეა. 2010 წლის ბოლო აღწერის შემდეგ ეს მაჩვენებელი 45 ათასით შემცირდა. ახალ აღწერაში ასევე ცალკეა ჩამოთვლილი ადამიანები საქართველოს ოკუპირებული რეგიონებიდან – 8 177 აფხაზი და 323 ოსი. ჯვარედინი ტაბულაცია აჩვენებს, რომ იმ პირთა 61%, რომლებიც აღწერაში ქართული წარმოშობის პირებად განიხილებიან, ქართულს მშობლიურ ენად მიიჩნევს.

რაც შეეხება რუსეთში მცხოვრებ საქართველოში დაბადებულ პირებს (მიუხედავად მათი ეთნიკური კუთვნილებისა), მათი მნიშვნელოვანი კლება ფიქსირდება – 2020 წლის აღწერით, მათი რაოდენობა 257 725 შეადგენს, 2010 წელს კი ეს მაჩვენებელი 551 674 იყო. სოციოლოგმა დავით სიჭინავამ „სამოქალაქო საქართველოს“ უთხრა, რომ კლების ასეთი მასშტაბი, შესაძლოა, ნაწილობრივ განპირობებული იყოს საბჭოთა საქართველოში დაბადებულ პირთა ბუნებრივი გაუჩინარებით.

რუსეთში მცხოვრები ქართველების რაოდენობა თბილისში მწვავე პოლიტიკური უთანხმოებების საგანი გახდა. გასულ წელს, პრემიერმინისტრმა, ირაკლი ღარიბაშვილმა განაცხადა, რომ თბილისი რუსეთის წინააღმდეგ ეკონომიკური სანქციების დაწესებისგან თავს იმიტომ იკავებს, რომ სანქციები მნიშვნელოვნად დააზარალებდა რუსეთში მცხოვრებ ერთ მლნ და საქართველოში მცხოვრებ ოთხ მლნ საქართველოს მოქალაქეს.