აქტუალური
კახა ბექაურმა პარლამენტარებს მედიაწიგნიერების ონლაინ პლატფორმა - Mediatsigniereba.ge გააცნო

 საქართველო, 23 მარტი, საქინფორმი. ComCom-ის თავმჯდომარემ, კახა ბექაურმა, პარლამენტის პლენარულ სესიაზე პარლამენტარებს მედიაწიგნიერების ონლაინ პლატფორმის შესახებ ინფორმაცია მიაწოდა. სიტყვით გამოსვლისას კახა ბექაურმა აღნიშნა, რომ პლატფორმა ერთგვარი ჰაბია, რომელიც საქართველოში მედიაწიგნიერების მიმართულებით მომუშავე ყველა ორგანიზაციისა თუ უწყებისთვის აერთიანებს რესურსებს და ხაზი გაუსვა, რომ ეს არის საუკეთესო მოდელი, რომელიც მედიაწიგნიერების მიმართულებით განხორციელებულ პროექტებზე წვდომას ნებისმიერი დაინტერესებული პირისთვის უზრუნველყოფს.

მისივე თქმით, მედიაწიგნიერების ონლაინ პლატფორმის შექმნა მიზნად მედიაწიგნიერების შესახებ ინფორმაციის ერთიან ონლაინ სივრცეში თავმოყრასა და საზოგადოებაში ცნობიერების ამაღლებას ისახავს, ამისთვის კი, მომხმარებელს მუდმივად განახლებად საგანმანათლებლო რესურსებს სთავაზობს.

კახა ბექაურმა საუბრისას აღნიშნა ისიც, რომ მედიაწიგნიერების ონლაინ პლატფორმაზე უკვე 100-ზე მეტი რესურსია განთავსებული.