„ნაციონალური მოძრაობის“ აქტივისტებსა და „ქრისტიან-დემოკრატების“ საკრებულოს ფრაქციას შორის დღეს დაპირისპირება მოხდა. როგორც საქინფორმს ქდმ-ის საკრებულოს დეპუტატმა ინგა გრიგოლიამ განუცხადა, იმ დროს, როდესაც ისინი საგადასახადო ტარიფების გაძვირების საკითხთან დაკავშირებით ნიკო მარის ქუჩაზე ისანი-სამგორის რაიონის მოსახლეობას ხვდებოდნენ, შეხვედრის ადგილზე „ნაციონალური მოძრაობის“ აქტივისტების ერთი ჯგუფი მივარდა და საკმაოდ აგრესიული რიტორიკით ხალხის დაშლა მოითხოვა. „მხოლოდ ნიღბები აკლდათ, სხვა მხრივ სპეცრაზმელებივით იქცეოდნენ. ჩვენ მათი ვინაობებიც დავადგინეთ. ესენი არიან ვალერი მუჯირიშვილი, ზურაბ ძნელაძე, მამუკა რაზმაძე და პაატა კობალეიშვილი. განსაკუთრებით აგრესიული მუჯირიშვილი გახლდათ. ისინი მოითხოვდნენ, ხალხი სასწრაფოდ დაშლილიყო და თან ამბობდნენ – უბანი არის ხვიჩა სანაიასი და მისი მეგობრები სანაიას კრიტიკას არ დავუშვებთო.

ხვიჩა სანაია საკრებულოში ისანი-სამგორის რაიონის დეპუტატია „ნაციონალური მოძრაობიდან“. როგორც ჩანს, მმართველი გუნდი წინასაარჩევნო კამპანიაში ჩაერთო, რასაც არც მეტი, არც ნაკლები, მოსახლეობის ტერორის სახე აქვს და ამ ტერორის ატანა წელიწად-ნახევარი მოგვიწევს“, – განაცხადა გრიგოლიამ.

საკრებულოს ოპოზიციონერი დეპუტატი ხელისუფლებას აფრთხილებს, საკუთარ ხალხზე ტერორი შეწყვიტოს. „ჩვენ ხვიჩა სანაიას პოლიტიკური პასუხისმგებლობის საკითხის დაყენებას ვაპირებთ, რადგან ის ამ ტერორს პირადად კურირებდა. მე მას ტელეფონით ვესაუბრე, რა დროსაც ყველაფერი იუარა, თუმცა საუბრიდან ცოტა ხანში იქ მოვარდნილმა ზონდერებმა დაიყვირეს – „ბიჭებო, სანაიამ თქვა, დაიშალეთ, ვიშლებითო“ – და წავიდნენ. გვიპასუხოს ხელისუფლებამ, რას ემსახურებოდა დღეს ამ ზონდერბრიგადების იქ მოვარდნა „ქრისტიან-დემოკრატების“ წინააღმდეგ. მაშინ, როცა სააკაშვილი და მისი ხელისუფლება გვიმტკიცებს, რომ ქურდული მენტალიტეტი საქართველოში აღარ არსებობს და არც დაბრუნდება, მოვითხოვთ, განგვიმარტონ, რას ნიშნავს ფრაზა – „უბანი ხვიჩა სანაიასია“, – აღნიშნა გრიგოლიამ.