ამის შესახებ საქართველოს პრემიერ-მინისტრმა ნიკა გილაურმა დასავლეთ-აღმოსავლეთ საქართველოს დამაკავშირებელ გზაზე აღდგენითი სამუშაოების დათვალიერების შემდეგ განაცხადა.

„დაზიანებულია გზის ოთხი ძალიან რთული, ჯამში კი – 25 მონაკვეთი. ჩვენ ავიყვანეთ კომპანიები, რომლებიც ატარებენ აღდგენით სამუშაოებს. გამოვიძახეთ, ასევე, სამაშველო ჯგუფები თბილისიდანაც იმისათვის, რომ სწრაფად მოხდეს სახლებიდან წყლის ამოტუმბვა და კედლების გამაგრება. შესაბამისი სამსახურები ზარალს ჯერ კიდევ ითვლიან“, – განაცხადა გილაურმა.

რიკოთის უღელტეხილზე სამძებრო და სამაშველო სამუშაოები ამ დრომდე გრძელდება. რიკოთზე მოძრაობა ცალმხრივადაა გახსნილი. დასავლეთიდან აღმოსავლეთისკენ მომავალ ავტომანქანებს გზა გამთენიისას გაუთავისუფლეს. ადგილზე მობილიზებული სპეციალური ტექნიკით გაწმენდითი სამუშაოები გრძელდება. გზების დეპარტამენტის სპეციალური ტექნიკა, მაშველები და მეგზევეები უწყვეტ რეჟიმში მუშაობენ.

სტიქიის ზონაში ჩასვლისას გილაურმა მთავრობის წევრებს დამატებითი მითითებები მისცა. საგანგებო თათბირს ფინანსთა და რეგიონული განვითარებისა და ინფრასტრუქტურის მინისტრებიც ესწრებოდნენ.