აქტუალური
ცვლილება საოჯახო სასტუმროების ბიზნესში
საქართველოს საგადასახადო კოდექსში ტურისტულ ზონებთან დაკავშირებით მორიგი ცვლილების შეტანა იგეგმება. ამ ცვლილების თანახმად, კერძო საოჯახო სასტუმროების მფლობელები შემოსავლების სამსახურში დარეგისტრირებული საკურორტო სეზონის განმავლობაში 1 კვადრატული მეტრი ფართის გაქირავებისთვის ფიქსირებულ გადასახადს – 10 ლარს გადაიხდიან. ცვლილების ინიციატორების განცხადებით, ეს საოჯახო სასტუმროს მფლობელთათვის გადასახადის გადახდას გაამარტივებს. თუმცა კერძო სასტუმროს მფლობელებს სურვილის შემთხვევაში ძველი, დღემდე მოქმედი სისტემითაც შეეძლებათ გადასახადის გადახდა. დღეს მოქმედი რედაქციით, კერძო სასტუმროს მფლობელები გადასახადს ვიზიტორების რაოდენობის მიხედვით იხდიდნენ. ამ ინიციატივას საპარლამენტო ოპოზიციის წარმომადგენლები მხარს არ უჭერენ, რადგან მიაჩნიათ რომ ამით კერძო მეწარმეთათავის საგადასახადო წნეხი მძიმდება.
პარლამენტის გუშინდელ პლენარულ სხდომაზე ფრაქცია „ქრისტიან-დემოკრატების“ თავმჯდომარე გიორგი ახვლედიანი თავის გამოსვლაში საგადასახადო კოდექსის იმ ნორმას შეეხო, რომლის თანახმადაც, ტურისტულ სექტორში დასაქმებულ მეწარმეებს დაუწესდებათ ფიქსირებული გადასახადი 1 კვადრატულ მეტრზე 10 ლარის ოდენობით. მისი განცხადებით, აღნიშნულ სექტორში დასაქმებულნი ისედაც მძიმე მდგომარეობაში იმყოფებიან და დღემდე იხდიან ბანკის კრედიტებს, შემოთავაზებული ნორმა კი მათ ფინანსურ მდგომარეობას კიდევ უფრო დაამძიმებს. ახვლედიანმა მთავრობისგან განმარტებები მოითხოვა და აღნიშნა, რომ უნდა შემუშავდეს ისეთი მექანიზმი, რომელიც განავითარებს ტურისტულ ბიზნესს და ამ სფეროში დასაქმებულ მეწარმეებს შეუწყობს ხელს. 
