სამართალი
საპროტესტო აქციის დარბევის შემდეგ დაკავებულთა მდგომარეობა კახეთში
საქართველოს ახალგაზრდა იურისტთა ასოციაციის თელავის ოფისის ხელმძღვანელ მარეხ მგალობლიშვილის ინფომაციით, დღეისათვის კახეთის იზოლატორებში 32 პატიმარი რჩება, რომლებიც 26 მაისს საპროტესტო აქციის დარბევის შემდეგ დააკავეს. პატიმრები ვერ ახერხებენ პირადი ჰიგიენის დაცვას. მისი თქმით, თელავის (18 პატიმარი), სიღნაღისა (5 პატიმარი) და ყვარელის (9 პატიმარი) იზოლატორებში მოთავსებულთა უმეტესობას 30 დღის ვადით პატიმრობა აქვს შეფარდებული. ისინი ვერ იბანენ ხან წყლის, ხან კი პირსახოცის უქონობის გამო, ვერ იპარსავენ წვერს და ვერ იჭრიან ფრჩხილებს. არც სავარცხელი აქვთ.
„ყველაზე მძიმე სიტუაცია თელავის დროებითი მოთავსების იზოლატორშია, სადაც 2 დიაბეტიანი პატიმარია მოთავსებული. ერთ-ერთ მათგანს დღის განმავლობაში ორჯერ სჭირდება ინსულინი და სპეციალური კვება, რომლის საშუალებაც იზოლატორში არ არის. ამ პატიმრების გასინჯვის მიზნით ორჯერ მოვითხოვეთ იზოლატორში ენდოკრინოლოგის შესვლა, მაგრამ – უშედეგოდ“, – განაცხადა მარეხ მგალობლიშვილმა. 
