სამართალი
მურმან დუმბაძესთან არც ოფთალმოლოგს უშვებენ, არც – მოძღვარს
საქართველოს ახალგაზრდა იურისტთა ასოციაციის თელავის ოფისის ხელმძღვანელისა და მურმან დუმბაძის ადვოკატ მარეხ მგალობლიშვილის ინფორმაციით, თელავის დროებითი მოთავსების იზოლატორის ადმინისტრაციამ პატიმართან არ შეუშვეს დუმბაძის პირადი მოძღვარი, რომელიც ბათუმიდან იყო ჩასული. იგი საღამომდე ალოდინეს იზოლატორთან და, მიუხედავად შეპირებისა, ბოლოს შეხვედრაზე უარი უთხრეს.
როგორც თავად ადვოკატი განმარტავს, მიუხედავად არაერთი შუამდგომლობისა, დროებითი მოთავსების იზოლატორის ადმინისტრაციამ ამ დრომდე არ უზრუნველყო, მურმან დუმბაძისთვის ექიმ-ოფთალმოლოგს გაეწია კონსულტაცია. „დუმბაძეს მხედველობასთან დაკავშირებით აქვს პრობლემა, მაგრამ ამ დრომდე მასთან ოფთალმოლოგის შესვლა ვერ მოხერხდა“, – აღნიშნა მარეხ მგალობლიშვილმა.
შეგახსენებთ: ოპოზიციის ერთ-ერთი აქტივისტი, რესპუბლიკური პარტიის ყოფილი წევრი, მურმან დუმბაძე სამართალდამცველებმა დაუმორჩილებლობის ბრალდებით 26 მაისს თბილისში საპროტესტო აქციის დაშლის დროს დააკავეს. დუმბაძე დაკავებისას სასტიკად არის ნაცემი და მთელ სხეულზე დაზიანებები აღენიშნება. თბილისის საქალაქო სასამართლომ დაკავებულს 30 დღით პატიმრობა შეუფარდა. მას თელავის იზოლატორში 2 დღის განმავლობაში არ მიეწოდებოდა საკვები და დროულად ვერ მიიღო სამედიცინო დახმარება.
