როგორც კალანდაძემ დღევანდელ ტრადიციულ პრესკონფერენციაზე განაცხადა, რუსეთის მსოფლიო სავაჭრო ორგანიზაციაში გაწევრებასთან დაკავშირებით ქართული მხარის მოთხოვნები ძალაში რჩება, მთავარი მოთხოვნა კი კვლავ საქართველო-რუსეთის ეკონომიკური საზღვრების გამჭვირვალობის უზრუნველყოფაა.

მინისტრის მოადგილემ „უჩვეულო“ უწოდა ინფორმაციას იმის შესახებ, თითქოს პრეზიდენტი სააკაშვილი და აშშ-ის ვიცე-პრეზიდენტი ჯოზეფ ბაიდენი საქართველოს მიერ რუსეთის მსო-ში გაწევრების უპირობო მხარდაჭერაზე შეთანხმდნენ. „ბაიდენთან შეხვედრისას საქართველოსთან დაკავშირებული საკითხები განიხილებოდა და საუბარი მათ შორის მსოფლიო სავაჭრო ორგანიზაციის თემასაც შეეხო, რომელთან დაკავშირებითაც ქართული მხარის მოთხოვნა ძალაში რჩება. არსებობს მოთხოვნები, რომელთა გადახედვა არ მოხდება და ამას როგორც აშშ, ისე ყველა სხვა პარტნიორი კარგად აცნობიარებს“, – განუცხადა ჟურნალისტებს კალანდაძემ.