საქართველო, 29 ივლისი, საქინფორმი. საქართველოს პარლამენტის დეპუტატმა, გურამ მაჭარაშვილმა „ქართული ოცნება“ დატოვა.

როგორც მან აღნიშნა, „ქართული ოცნებიდან“ წასულ სამ დეპუტატს – დიმიტრი ხუნდაძეს, სოზარ სუბარსა და მიხეილ ყაველაშვილს შეუერთდება.

„არ ვიქნები პირველი, თუ ვიტყვი, რომ მსოფლიოში მიმდინარეობს საკმაოდ რთული პოლიტიკური პროცესები, გამომდინარე აქედან, საქართველო, ბუნებრივია, ვერ იქნება გამონაკლისი. საქართველოშიც არსებობს გამოწვევები და განსაკუთრებით მას შემდეგ, რაც გამოქვეყნდა ბატონი ბიძინა ივანიშვილის წერილი და შესაბამისად, საზოგადოებისგანაც ჰქონდა ადეკვატური რეაგირება ამ წერილზე. კიდევ ერთხელ დავრწმუნდი, რომ სწორია ის პოლიტიკა, რომელსაც ჰქვია საზოგადოებისთვის საჭირო ინფორმაციის მიწოდება, რადგან დემოკრატიის ფუნდამენტური პრინციპია, რომ საზოგადოებამ იცოდეს პოლიტიკური პროცესები. გამომდინარე აქედან, გადაწყვეტილების მიმღები სწორედ არის საზოგადოება“, – განაცხადა მაჭარაშვილმა.

მაჭარაშვილის განმარტებით, მისი დღევანდელი პოზიცია, რომელსაც ჰქვია „ქართული ოცნების“ წევრობა, შეიძლება იყოს გარკვეული დამაბრკოლებელი ფაქტორი, რათა საჭირო ინფორმაცია მიეწოდოს საზოგადოებას.

„გამომდინარე აქედან, გუნდის ხელმძღვანელობას, ზოგადად, გუნდის წევრებს რომ არ შეექმნათ რაიმე უხერხულობა, ამიტომ მივიჩნიე საჭიროდ, რომ დავტოვო ფრაქცია „ქართული ოცნების“ წევრობა და ჩემს კოლეგებთან ერთად საჭირო ინფორმაცია მივაწოდოთ საზოგადოებას.

კიდევ ერთხელ მინდა, ვთქვა: „ქართულ ოცნებასთან“ მე არასდროს მქონია და არ მაქვს რაიმე ტიპის პოლიტიკური შეუთავსებლობა, პირიქით – მგონია, რომ კურსი, რომელიც ჰქონდა და აქვს, არის სწორი. ამ ეტაპზე მივიჩნიე საჭიროდ, როგორც ჩემმა კოლეგებმა, რომ არ ჩავარდეს უხერხულობაში პოლიტიკური კონიუნქტურიდან გამომდინარე გუნდი, დამოუკიდებლად გავაგრძელებთ იმ ინფორმაციის მიწოდებას საზოგადოებისთვის, რომელიც არის საჭირო, რათა მათ თავად მიიღონ გადაწყვეტილებები“, – განაცხადა მაჭარაშვილმა.