თბილისის მერიის საზოგადოებასთან და მედიასთან ურთიერთობის სამსახურის ცნობით, ვაკისა და საბურთალოს მიმართულებით მოძრაობის სრულად განტვირთვის მიზნით, თბილისის მერია ვაკე-საბურთალოს შემაერთებელ გზაზე სამუშაოების მეორე ეტაპს იწყებს, რომლის ფარგლებში ახალი მაგისტრალიდან იყალთოს მთის გავლით (გვირაბით) თამარაშვილის ქუჩამდე 1 800-მეტრიანი მონაკვეთი აშენდება. ამჟამად გვირაბის გაჭრის სამუშაოები მიმდინარეობს, რომლის სიგრძე 204 მეტრია, სიმაღლე – 5 მ, სიგანე – 10,5 მ; ასევე, გაკეთდება ბახტრიონის ქუჩასთან შემაერთებელი კვანძი, ვერეს ხევის მაგისტრალიდან გვირაბამდე მისასვლელი გზა და მოეწყობა შესაბამისი საინჟინრო კომუნიკაციები.

სამუშაოები 2011 წლის ბოლოს დასრულდება. აღნიშნული მონაკვეთის გავლით მოსახლეობა უმოკლესი მარშრუტით გადაადგილდება. თბილისის მერია 2012 წელს ვერეს ხეობის გავლით, ჭავჭავაძის გამზირიდან (მეცხრე საავადმყოფოს მიმდებარედ) რამიშვილის ქუჩასთან დამაკავშირებელი 5 000 მ სიგრძის საგზაო მონაკვეთის მშენებლობას დაიწყებს. სამუშაოები 2012 წლის ბოლოს დასრულდება და ვაკე-საბურთალოს დამაკავშირებელი მაგისტრალი დასრულებულ სახეს მიიღებს, რაც ქალაქის ამ მონაკვეთზე მოძრაობას სრულად განტვირთავს. კომუნიკაციების მოწესრიგებისა და ტერიტორიის გამწვანების შემდეგ, ვერეს ხეობა თავისი ინფრასტრუქტურით უნიკალური გახდება როგორც ტრანსპორტით მოძრავი, ისე ფეხით მოსიარულეთათვის.