საქართველოს პრეზიდენტის ადმინისტრაციის პრესსამსახურის ინფორმაციით, მიხეილ სააკაშვილი რომში წმიდა თომა ვილანოველის სახელობის ტაძარში წმიდა ანდრია პირველწოდებულის სახელობის ქართულ სამრევლოსთან ერთად ლოცვას დაესწრო, რომელიც ქართულ ენაზე დღეს პირველად აღევლინა. ლოცვის დასრულების შემდეგ მიხეილ სააკაშვილმა ქართველ მრევლს მიმართა.

„ქართული სახელმწიფოს ჩამოყალიბებასთან ერთად, გაჩნდა იმის შეგნება და საშუალება, რომ ყველგან იყოს, თუნდაც, მოკრძალებული საკვირაო სკოლები, იყოს კულტურული ჯგუფები, ფოლკლორული ანსამბლები, დისტანციური განათლების სხვადასხვა კურსები, რათა ჩვენმა ბავშვებმა არ დაკარგონ ქართული ენა... ადრე ამის რესურსები არ გვქონდა. ეს ძალზე მნიშვნელოვანია, რადგან, თუ კარგავენ ენას, კარგავენ იდენტურობას; იდენტურობის დაკარგვით კი, იკარგება მთავარი რამ, რასაც ეფუძნება ჩვენი ნიჭიერება. ამიტომ ერთ-ერთი მთავარი საკითხი საქართველოში არის პოზიტიური მიგრაციის სალდო...“ – აღნიშნა საქართველოს პრეზიდენტმა.

მისი თქმით, „ ჩვენს ქვეყანას, რა თქმა უნდა, ჯერ კიდევ ძალიან უჭირს... გუშინ მქონდა ჩვენი მხარდამჭერი, თბილი და ხანგრძლივი შეხვედრა ამერიკის ვიცე-პრეზიდენტთან. მთავარი, რაც მან თქვა, იყო ის, რომ ორი ორი წლის წინათ გადატანილი უბედურების შემდეგ, ქვეყანა ასე წამომდგარიყო ფეხზე და ასე სწრაფად დამდგარიყო წარმატების გზას, მსგავსი მაგალითი არ ვიციო. ეს არის ქართველების განსაკუთრებული ნიჭი. ყველაფერი გვაქვს განცდილი, ყველა ქარბობალამ გადაიარა ჩვენს თავზე და მაინც არ გავტყდით. მთავარია არა ის, რომ არ წაიქცე, არამედ ის, რომ შეძლო წამოდგომა და გზის გაგრძელება“.