აქტუალური
კახა ძაგანია ბაიდენისა და სააკაშვილის შეხვედრას „ორი გველის ამბორს“ უწოდებს
საქართველოს პრეზიდენტისა და აშშ-ის ვიცე-პრეზიდენტის რომში გამართული შეხვედრა „ლეიბორისტული პარტიის“ იდეოლოგიურმა მდივანმა დღევანდელ პრესკონფერენციაზე შეაფასა. მისი თქმით, საკუთარ ხალხზე სისხლიანი ანგარიშსწორების ავტორის, დიქტატორ სააკაშვილის თავის ერთგულ მფარველ ჯოზეფ ბაიდენთან შეხვედრა ქართველი ხალხის სულში მორიგი ჩაფურთხება და დემოკრატიისთვის ლახვარის ჩაცემა იყო.
„ეს შეხვედრა იყო დასტური იმისა, რომ „ამერიკის ერთგულ გოშიებს“, არაერთგული დიქტატორებისგან განსხვავებით, სისხლისღვრა ეპატიებათ“, – განაცხადა ძაგანიამ.
შეგახსენებთ, რომ ბაიდენისა და სააკაშვილის შეხვედრა რომში გაიმართა, სადაც სხვა ქვეყნების ლიდერებთან ერთად იტალიის გაერთიანების 150 წლისთავისადმი მიძღვნილი ღონისძიებები იმართება. აშშ-ის ვიცე-პრეზიდენტი რომში რუსეთის პრეზიდენტ დიმიტრი მედვედევსაც შეხვდება.
