„Amnesty International“-მა კიდევ ერთხელ მოუწოდა საქართველოს ხელისუფლებას, გამოიძიოს ცუდი მოპყრობისა და პოლიციის ძალადობის ყველა ბრალდება, რომლებიც 26 მაისის აქციის დაშლასა და მის შემდგომ პერიოდს უკავშირდება.

უფლებადამცველმა ორგანიზაციამ განაცხადა, რომ მას აქვს ინფორმაცია რამდენიმე დაშავებული პოლიციელისა და ერთი პოლიციელის გარდაცვალების შესახებ, ასევე, „უამრავი სანდო ინფორმაცია იმ ძალადობის შესახებ, რომელიც მომიტინგეებმა ჩაიდინეს“.

„მაგრამ ის [„Amnesty International“] შეშფოთებულია იმის გამო, რომ ამგვარი ბრალდებები არ უნდა იქნეს გამოყენებული პოლიციის ოფიცრების მიერ ძალის გამოყენებასთან დაკავშირებული კანონისა და საერთაშორისო სტანდარტების იგნორირების საბაბად“, – განაცხადა უფლებადამცველმა ორგანიზაციამ 1 ივნისს.

„Amnesty International“-მა, ასევე, მოუწოდა ხელისუფლებას, უზრუნველყოს დაკავებულთა უფლებების დაცვა და მათთვის სამართლიანი და გამჭვირვალე სასამართლო პროცესების ჩატარება.

იგი მიესალმა იმ ფაქტს, რომ შსს-მ ბოდიში მოუხადა ყველა იმ ჟურნალისტს, რომლებმაც აქციის დაშლის დროს სხვადასხვა დაზიანება მიიღეს ან ხელი შეეშალათ პროფესიული საქმიანობის განხორციელებაში.

„თუმცა „Amnesty International“ სინანულს გამოხატავს იმასთან დაკავშირებით, რომ ბოდიშის მოხდა მხოლოდ ჟურნალისტებს შეეხო და არ ეხებოდა იმ დარღვევებს, რომელთაც მიტინგში მონაწილეთა წინააღმდეგ ჰქონდა ადგილი“, – ნათქვამია უფლებადამცველი ორგანიზაციის განცხადებაში.

პარლამენტის წინ 26 მაისს ერთი პოლიციელი და, სულ ცოტა, სამი მომიტინგე გარდაიცვალა სპეცრაზმის მიერ აქციის წყლის ჭავლით, რეზინის ტყვიებითა და ცრემლსადენი გაზით დაშლისას.

შინაგან საქმეთა სამინისტროს მტკიცებით, გარდაცვალების არცერთი ფაქტი არ უკავშირდება სპეცრაზმის ქმედებებს.

სამინისტროს თქმით, პოლიციელი და ერთი მომიტინგე საპროტესტო აქციიდან გამოსული მანქანების სწრაფად მიმავალმა კოლონამ გაიტანა. პოლიციის თქმით, აქციის მთავარი ორგანიზატორის – ნინო ბურჯანაძის, კოლონამ მას შემდეგ დატოვა საპროტესტო აქციის ადგილი, რაც სპეცრაზმმა შუაღამის შემდეგ აქციის დაშლა დაიწყო.

ოფიციალური ვერსიის თანახმად, კიდევ ორი მომიტინგის გარდაცვალების მიზეზი ელექტროსადენებთან მათი შეხება გახდა. ორივე მათგანი, შსს-ის განცხადებით, თავისუფლების მეტროსთან მდებარე ერთ-ერთი მაღაზიის სახურავზე აღმოაჩინეს, იმ ტერიტორიის სიახლოვეს, სადაც სპეცრაზმმა მომიტინგეები დაარბია.

თუმცა, სულ ცოტა, ერთი მომიტინგის – ნიკა კვინტრაძის, გარდაცვალების გარემოება, რომელიც, შსს-ის თქმით, ელექტროსადენების შეხების შედეგად გარდაიცვალა, კითხვის ნიშნის ქვეშ დადგა მას შემდეგ, რაც კვინტრაძის მეგობარმა განაცხადა, რომ ნიკა კვინტრაძე პოლიციამ აქციის დაშლის დროს დააკავა; იგი, ასევე, აცხადებს, რომ საპროტესტო აქციის ადგილას გადაღებულ ფოტოზე ამოიცნო თავისი მეგობარი, სადაც ხელებშეკრული კვინტრაძე სხვა დაპატიმრებულ მომიტინგეებთან ერთად მიწაზე წევს. მართალია, მისი სახე არ ჩანს, მაგრამ კვინტრაძის მეგობარი აცხადებს, რომ იგი ტანსაცმლით ამოიცნო.

თუმცა მისი ამ განცხადების შემდეგ ტელეკომპანია „რუსთავი 2“-მა დღისით გადაღებული კადრები გაავრცელა, სადაც ნიკა კვინტრაძე და მისი მეგობარი პარლამენტის წინ აქციაზე დგანან. ტელეკომპანიის თქმით, ჩანაწერი 25 მაისს გაკეთდა, სადაც კვინტრაძეს ფოტოზე აღბეჭდილი მამაკაცისგან განსხვავებული მაისური აცვია.

შინაგან საქმეთა სამინისტროს ინფორმაციით, მართალია, კვინტრაძისა და მასთან ერთად ნაპოვნი მეორე მომიტინგის გარდაცვალების გარემოებების გამოძიება ჯერ არ დასრულებულა, მაგრამ სასამართლო ექსპერტიზამ დაადასტურა, რომ გარდაცვალება ელექტროსადენებთან შეხებამ გამოიწვია.