საპროტესტო აქციის დაშლისას სახეზეა პოლიციის მხრიდან „ძალის გადამეტება და, შესაბამისად, დანაშაულის ნიშნები“, – ნათქვამია საქართველოს ახალგაზრდა იურისტთა ასოციაციისა (საია) და „საერთაშორისო გამჭვირვალობა – საქართველოს“ ერთობლივ განცხადებაში.

„იმ შემთხვევაშიც კი, რომ აქციის დაშლის გადაწყვეტილება ყოფილიყო ლეგიტიმური, მედიით გავრცელებული კადრები აშკარად მიუთითებს პოლიციის მხრიდან ძალის გადამეტების ნიშნებზე, რაც „პოლიციის შესახებ“ კანონის მოთხოვნების უხეშ დარღვევას წარმოადგენს. აღნიშნული ფაქტი არ შეიძლება დარჩეს ეფექტური გამოძიებისა და სამართლებრივი რეაგირების გარეშე“, – ნათქვამია მათ პირველად განცხადებაში.

„მედიის მიერ გავრცელებული ინფორმაციის თანახმად, აქციის დაშლას მოჰყვა ძალის არაპროპორციული გამოყენება, უკვე დაკავებული დემონსტრანტების ცემა, რომლებიც პოლიციას არავითარ წინააღმდეგობას არ უწევდნენ. არსებული ინფორმაციით, ადგილი ჰქონდა ჟურნალისტებისთვის პროფესიული საქმიანობისთვის ხელის შეშლას, რამდენიმე მათგანი დაშავებული ან/და დაკავებულია“, – აცხადებს ორი ორგანიზაცია.

ამასთან, საია მზადაა, სამართლებრივი დახმარება აღმოუჩინოს ყველა დაკავებულ პირს.