საზოგადოება
სახალხო მოძრაობა „სამეგრელომ“ 26 მაისი განსხვავებულად აღნიშნა
როგორც საქინფორმის რეგიონული კორესპონდენტი სამეგრელოში ზუგდიდიდან გვატყობინებს, სახალხო მოძრაობა „სამეგრელოს“ ზუგდიდის ორგანიზაციის თავმჯდომარე ზურაბ კვარაცხელიამ და ამ მოძრაობის წევრებმა გვირგვინითა და ყვავილებით შეამკეს საქართველოს პირველი პრეზიდენტის – ზვიად გამსახურდიას, ბიუსტი, რომელიც 9 წლის წინათ სახალხო მოძრაობა „სამეგრელოს“ ლიდერ ალექსანდრე ჭაჭიას ინიციატივითა და ძალისხმევით დაიდგა ზუგდიდში.
„26 მაისს ჩვენ აღვნიშნავთ არა საქართველოს დამოუკიდებლობის აღდგენის მე-20 წლისთავს, როგორც ხელისუფლება აცხადებს, არამედ აღვნიშნავთ ზვიად გამსახურდიას პრეზიდენტად არჩევისა და მერაბ კოსტავას დაბადების დღეს. რაც შეეხება დამოუკიდებლობის აღდგენის დღეს, ჩვენ მიგვაჩნია, რომ ეს დღე უნდა აღინიშნოს არა 26 მაისს, არამედ 9 აპრილს, რომელსაც, რატომღაც, როგორც შევარდნაძის, ისე სააკაშვილის ხელისუფლება უგულებელყოფს“, – აღნიშნა ზურაბ კვარაცხელიამ. 
