საქართველოს სახალხო დამცველმა გიორგი ტუღუშმა განაცხადა, რომ მისი აპარატი სწავლობს უფლებათა დარღვევის ყველა იმ შესაძლო ფაქტს, რომელთაც ადგილი ჰქონდა ბათუმსა და თბილისში მიმდინარე საპროტესტო აქციის მონაწილეების მიმართ და, ასევე, იმ ფაქტებს, რომლებიც უკავშირდება აქციების დროს ჟურნალისტური საქმიანობისთვის ხელის შეშლას.

„როგორც კი გვექნება სრული სურათი, სახალხო დამცველი მისცემს ყველაფერს ზუსტ შეფასებას“, – განუცხადა სახალხო დამცველმა ჟურნალისტებს 24 მაისს და დასძინა, რომ სახალხო დამცველის აპარატის წარმომადგენლებმა უკვე მოინახულეს იზოლატორებში დაკავებული ოპოზიციონერი აქტივისტები.

„ყველა შემთხვევაში ხელისუფლებამ უნდა უზრუნველყოს აქციის მშვიდობიანი ჩატარება და აქციას არ უნდა შეეშალოს ხელი, თუ იგი მშვიდობიანია, გარეშე პირების მიერ“, – განაცხადა მან.

ტუღუშის განცხადებით, ასევე, „კატეგორიულად დაუშვებელია“ ჟურნალისტებისათვის „სიტყვიერი და ფიზიკური“ შეურაცხყოფის მიყენება, „მიუხედავად იმისა, მოგვწონს თუ არა რომელიმე მედიასაშუალება“.