დამოუკიდებლობის დღის აღსანიშნავად დაგეგმილი სამხედრო აღლუმი 26 მაისს „ჩვეულებრივად ჩატარდება“, – განაცხადა თავდაცვის სამინისტროს საზოგადოებასთან ურთიერთობის დეპარტამენტის ხელმძღვანელმა სალომე მახარაძემ.

„რაც შეეხება რეპეტიციას რუსთაველის გამზირზე, ზუსტად არ ვიცი, გაიმართება თუ არა კიდევ, – განუცხადა მან ჟურნალისტებს, – თუმცა ბაზაზე სამხედროები ყოველდღიურად გადიან რეპეტიციას“.

„დემოკრატიული მოძრაობა – ერთიანი საქართველოს“ ლიდერმა ნინო ბურჯანაძემ განაცხადა, რომ სახალხო კრება „ყველაფერს გააკეთებს იმისათვის, რომ ამ ხელისუფლებამ ვერ ჩაიბაროს აღლუმი მშვიდად“.

მისი თქმით, მომიტინგეები 25 მაისს კოსტავას გამზირიდან თავისუფლების მოედანზე გადაინაცვლებენ.

სამხედრო აღლუმის გამართვა რუსთაველის გამზირზე იგეგმება.

„აღლუმის გამართვის გეგმა არ შეიცვლება, – განუცხადა ჟურნალისტებს აკაკი მინაშვილმა, დეპუტატმა მმართველი პარტიიდან, – აღლუმი – ეს არ არის მხოლოდ ხელისუფლების ღონისძიება, ეს არის დამოუკიდებლობის დღე და მას ყველამ პატივი უნდა სცეს!“

რაც შეეხება ოპოზიციის აქციას, მინაშვილმა განაცხადა, რომ „თბილისი დიდი ქალაქია და ოპოზიციას ექნება შესაძლებლობა, სხვაგან ჩაატაროს მანიფესტაცია“.