საქართველო, 2 დეკემბერი, საქინფორმი. საქართველოს მთავრობამ გაასაჩივრა სტოკჰოლმის საარბიტრაჟო სასამართლოს გადაწყვეტილება, რომლითაც საქართველო ვალდებულია რუსული ენერგოჰოლდინგის „ინტერ რაოს" შვილობილ კომპანიებს 80,5 მლნ დოლარი გადაუხადოს, ნათქვამია საქართველოს იუსტიციის სამინისტროს განცხადებაში.

სარჩელი საქართველოს წინააღმდეგ შეიტანეს ნიდერლანდებში რეგისტრირებულმა „ინტერ რაოს" შვილობილმა კომპანიებმა Gardabani Holdings-მა, რომელიც ორ ქართულ ჰესს - „ხრამი-1"-სა და „ხრამი-2"-ს ფლობს, და Silk Road Holdings-მა , რომელსაც ელექტროგამანაწილებელი კომპანია „თელასის" (ემსახურება თბილისს) 75% ეკუთვნის. მოსარჩელეები საქართველოს ხელისუფლებისგან ლარის დევალვაციით გამოწვეული ზარალის კომპენსაციას ითხოვდნენ.

„ინტერ რაო" ითხოვდა კომპენსაციას 200 მილიონი აშშ დოლარის ოდენობით, რაც საქართველოს მთავრობის მიერ წარდგენილი არგუმენტებისა და მტკიცებულებების საფუძველზე არ დაკმაყოფილდა და 2021 წლის 23 ნოემბერს კომპენსაციის ოდენობად განისაზღვრა 80,5 მილიონი აშშ დოლარი", – აღნიშნულია იუსტიციის სამინისტროს განცხადებაში.

განცხადებაში ასევე ნათქვამია, რომ, იმისდა მიუხედავად, თუ რითი დასრულდება ეს დავა, სამომხმარებლო ტარიფები საქართველოში არ შეიცვლება.

რუსული ენერგოჰოლდინგის ვერსიით, საუბარია საქართველოს მხრიდან ვალდებულების დარღვევაზე, რომელიც, საქართველოსა და ნიდერლანდებს შორის „ინვესტიციების სტიმულირებისა და ურთიერთდაცვის შესახებ" შეთანხმების თანახმად, გულისხმობს ინვესტიციებისადმი სამართლიან და თანასწორ დამოკიდებულებას. კერძოდ, დავა შეეხება 2014 წელს ლარის დევალვაციასთან დაკავშირებით ენერგოტარიფების მომატებაზე საქართველოს ხელისუფლების უარს.

„სახელმწიფო ახლაც მიიჩნევს, რომ 2014 წელს ტარიფები სწორად იქნა განსაზღვრული და ამიტომ არბიტრაჟის გადაწყვეტილება გასაჩივრებულია სტოკჰოლმის სასამართლოში, როგორც დაუსაბუთებელი", – ნათქვამია იუსტიციის სამინისტროს განცხადებაში.