საქართველო, 20 ოქტომბერი, საქინფორმი. მოვუწოდებ ყველას, იმოქმედონ ევროპული ღირებულებების შესაბამისად, მიხეილ სააკაშვილს არაფერი აქვს საერთო ევროპულ ღირებულებებთან, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

კითხვაზე, როგორც შეაფასებდა 70 ევროპარლამენტარის წერილის, რომლის მიხედვითაც ისინი მიხეილ სააკაშვილის გათავისუფლებას მოითხოვენ, ირაკლი კობახიძემ აღნიშნა: „70 ევროპარლამენტარი აწერს ამას ხელს?! ეს არის ტყუილი. დღევანდელი დილის მდგომარეობით ერთი ევროპარლამენტარი აწერდა ხელს, თუმცა ეს არის პრობლემა, როდესაც თუნდაც ერთი ევროპარლამენტარი აწერს ხელს ასეთ წერილს, ეს არის თავისთავად პრობლემა. რაც შეეხება 70-ს, იქ შედის ელენე ხოშტარია, ბათუ ქუთელია და ა.შ. ისინი თუ არიან ევროპარლამენტარები არ ვიცი, მე მგონი ჯერ არ გამხდარან. ერთია ევროპარლამენტარი, რომელიც ამას აწერს ხელს და ერთი 70-ზე ბევრად ნაკლებია“.

მისივე თქმით, ვინც აწერს ხელს ასეთ წერილს, ხდება იმ დანაშაულის გარკვეულწილად თანამონაწილე, რომელიც მიუძღვის მიხეილ სააკაშვილს ქართული სახელმწიფო და ქართული საზოგადოების, ქართველი ხალხის წინაშე.

„ეს არ არის ის, რასაც ჰქვია ევროპული ღირებულებები. მოვუწოდებ ყველას, იმოქმედონ ევროპული ღირებულებების შესაბამისად, მიხეილ სააკაშვილს არაფერი აქვს საერთო ევროპულ ღირებულებებთან“, – განაცხადა კობახიძემ.