როგორც კონგრესის მიერ გავრცელებულ სპეციალურ განცხადებაშია ნათქვამი, სოლიდარობას უცხადებენ და აფასებენ იმ ადამიანთა სიმამაცეს, რომლებიც ხელისუფლებისა და პრეზიდენტ მიხეილ სააკაშვილის წინააღმდეგ ღიად გამოდიან. „კონგრესის წევრები მზად არიან, გვერდით დაუდგნენ ოპოზიციის ლიდერებს, მაგრამ, სამწუხაროდ, მოკლებულნი არიან ამ შესაძლებლობას, რადგან საქართველოს მთავრობა არ აძლევს საქართველოს მოქალაქეობას ყველას, ვინც წარმომავლობით საქართველოდანაა. რაც შეეხება საქართველოს ხელისუფლების პროვოკაციულ განცხადებებს იმის თაობაზე, რომ კონგრესი ოპოზიციის საქმიანობას აფინანსებს, ისინი ყოველგვარ საფუძველსაა მოკლებული“, – ნათქვამია კონგრესის განცხადებაში.

ამასთან, კონგრესში აცხადებენ, რომ „შესაბამისი წყაროებიდან მიღებული ინფორმაციის თანახმად, საქართველოს ძალოვან სრუქტურებში მომზადდა ფალსიფიცირებული ვიდეოჩანაწერი იმის შესახებ, თუ როგორ აფინანსებენ ქართული წარმომავლობის რუსი ბიზნესმენები ოპოზიციური აქციების ჩატარებას საქართველოში, რაც სიმართლეს არ შეესაბამება“. „პრეზიდენტ სააკაშვილისგან განსხვავებით, „საქართველოს ხალხთა მსოფლიო კონგრესი“ პატივს სცემს საქართველოს კანონებს და არ ახორციელებს ისეთ ქმედებებს, რომლებიც საქართველოს კანონმდებლობას დაარღვევდნენ“, – აღნიშნულია განცხადებაში.

„საქართველოს ხალხთა მსოფლიო კონგრესის“ წევრები „სახალხო კრების“ ლიდერებს მშვიდობიანი საპროტესტო აქციის წარმატებით ჩატარებას უსურვებენ.