ევროპარლამენტი საქართველოს სასამართლო სისტემის, კანონის უზენაესობის, მედიის პლურალიზმისა და ოპოზიციასთან თანამშრომლობის მხრივ ახალი რეფორმების გატარებისკენ მოუწოდებს. ამის შესახებ საქართველოს პარლამენტის თავმჯდომარე დავით ბაქრაძესთან გამართული შეხვედრის დასრულების შემდეგ ევროპარლამენტის თავმჯდომარე ერჟი ბუზეკმა განაცხადა, რომელმაც საქართველოს გატარებული რეფორმები მიულოცა, თუმცა, ამავე დროს, ახალი რეფორმების გატარებისკენ მოუწოდა.

„მოდი, მივცეთ დამატებითი იმპულსი ახალი რეფორმების გატარებას. ეს აუცილებელია იმისათვის, რომ საქართველოსა და ევროკავშირს შორის არსებობდეს სწორი ურთიერთთავსებადობა, ამის გარეშე შეუძლებელი იქნება ეკონომიკური ზრდის მიღწევა და, ზოგადად, ქვეყნის განვითარება“, – განაცხადა ბუზეკმა და იქვე ხაზი გაუსვა, რომ ევროპარლამენტს არ სურს, საქართველოს რაიმე მოახვიოს თავს, არამედ სურს, აღნიშნული ინიციატივები თავად საქართველოს მოქალაქეებისა და ხელისუფლების მხრიდან მომდინარეობდეს.

„სათანადოდ თანამშრომლობისათვის აუცილებელია უფრო მეტი თავსებადობა ჩვენს სისტემებს შორის“, – დასძინა ევროპარლამენტის თავმჯდომარემ.