საქართველო, 2 სექტემბერი, საქინფორმი. პარტია „საქართველოსთვის“ თბილისის მერობის კანდიდატი გიორგი გახარია იქნება.

ამის შესახებ გიორგი გახარიამ გუშინდელ პრეზენტაციაზე განაცხადა.

როგორც გახარიამ აღნიშნა, დღეს პარტია „საქართველოსთვის“ არის ერთადერთი პარტია მზარდი რეიტინგით.

„ვაცხადებთ სრულ მობილიზებას და ვამბობთ, თბილისიდან დაწყებული, საქართველოს თითოეულ პუნქტში ვიბრძოლებთ ბოლომდე ღირსეულად, კეთილსინდისიერად და პროფესიონალურად. მინდა, თითოეულ ჩემს თანაგუნდელს მივმართო, სიმართლე ერთია და არ არსებობს სხვა სიმართლე. სიმართლეა, რომ სახელმწიფო, რომელიც მართულია „ქართული ოცნების“ დღევანდელი ბოსებით, ძალადობს საქართველოს მოქალაქეებზე, იმის გამო, რომ მათ გამოხატეს თავისი პოლიტიკური აზრი. მინდა, ჩემს ყოფილ თანაგუნდელებს ვუთხრა, დღეიდან თქვენ საქმე გექნებათ ჩემთან. სოლიდარობის მიზნით თითოეული ჩვენი მერობის კანდიდატის მიმართ, რომელთაც მძიმე პირობებში უწევთ ბრძოლა, მე ერთი, ცალკე აღებული საქართველოს მოქალაქე და თბილისელი, ყველანაირი პოლიტიკური კეკლუცობის გარეშე ვაცხადებ, რომ თქვენთან ერთად ვერთვები თბილისის მერობისთვის ბრძოლაში.

მე თბილისში დავიბადე და გავიზარდე, მე ამ ქალაქის სისხლი და ხორცი ვარ. ბევრზე უკეთესად ვიცი, რა სჭირდება ამ ქალაქს. ისიც კარგად მესმის, რომ ამ ქალაქს სჭირდება ღირსებისა და სამართლიანობის შენარჩუნება. ამ ქალაქს სჭირდება კორუფციისა და ნეპოტიზმისგან დაცლილი და სუფთა გარემო. ამ ქალაქს, ამასთან ერთად, სჭირდება დიდი ამბიციები, რომ გახდეს რეგიონში ყველაზე მნიშვნელოვანი მეგაპოლისი, ამ ქალაქს სჭირდება მეგაპროექტები. ჩვენ კონკრეტულ გეგმას შევთავაზებთ თბილისელებს, როგორ უნდა გახდეს თბილისი პირველი მეგაპოლისი ჩვენს რეგიონში. ამისთვის ჩვენ უაღრესად სწრაფად შეგვიძლია სატრანსპორტო კვანძებით დავაკავშიროთ ერთმანეთთან თბილისი, ლილო, რუსთავი, განვავითაროთ მეტრო. ეს იქნება უარღესად დიდი ეკონომიკური ენერგიის მატარებელი არა მხოლოდ თბილისისთვის, არამედ მთელი საქართველოსთვის“, – განაცხადა გახარიამ.

იმ დღესვე გიორგი გახარიამ საკრებულოების წევრობისა და მერობის კანდიდატებიც წარადგინა.

რაც შეეხება თბილისის საკრებულოს, პარტიიდან წარდგენილი არიან: ლევან დოლიძე; ზაზა თავაძე; სალომე კობალაძე; გიორგი შარაშიძე; დავით ფარცვანია; თამარ (ტატა) ხვედელიანი; ეკატერინე ვეფხვაძე; მალხაზ მჭედლიშვილი; საბა ჯიქიძე; გიორგი სოსელია; თიკო თვალაძე; გიორგი კიკნაველიძე; ზაურ რეხვიაშვილი; ქეთევან ბაკარაძე; ვატო ფაჩულია.