საქართველოს სახალხო დამცველო ნინო ლომჯარიავ!

საქართველოს გენერალურო პროკურორო ირაკლი შოთაძევ!

თქვენ წინაშეა არა პუბლიცისტიკა, არამედ ოფიციალური ღია წერილი, ამიტომ ველოდები თქვენს პასუხს კანონით დადგენილ ვადებში.

   ჩემს პუბლიკაციებში, 2012 წლის ოქტომბრიდან მოყოლებული, მე არაერთხელ ვიტყობინებოდი, რომ საქართველოში აღვივებენ ეთნიკურ შუღლს ქართველებსა და აზერბაიჯანელებს შორის, განსაკუთრებით - აზერბაიჯანელებით კომპაქტურად დასახლებულ ქვემო ქართლში. მიუხედავად იმისა, რომ კონკრეტულად ვუთითებდი, ვინ და როგორ აკეთებდა ამას, ჩემი გაფრთხილებები უყურადღებოდ რჩებოდა და შედეგად, ყოველ ჯერზე ინციდენტები მოჰყვებოდა, განსაკუთრებით – არჩევნების დროს.

   2020 წლის ოქტომბერში, ისევ არჩევნებამდე, ჩემს პუბლიკაციაში ვაფრთხილებდი, რომ საქართველოში მზადდებოდა ქართულ-აზერბაიჯანული კონფლიქტი, რომელიც, ორგანიზატორების გათვლებით, უნდა გადაზრდილიყო სახელმწიფოთაშორის - საქართველოსა და აზერბაიჯანს შორის დაპირისპირებაში. მაგრამ ხელისუფლებამ კვლავ უგულებელჰყო ჩემი გაფრთხილება, თუმცა აწ განსვენებულმა ზურაბ ჟვანიამ ტყუილუბრალოდ როდი დამაკისრა ეროვნულ უმცირესობებთან მუშაობის კურირება, რასაც ვაკეთებდი კიდეც „საქართველოს მოქალაქეთა კავშირის“ სახელით, ჯერ თანაშემწის, შემდეგ კი „სმკ“ გენერალური მდივნის აპარატის უფროსის რანგში. მიღებული გამოცდილებისა და პრობლემების შესახებ ინფორმაცია მოგვიანებით გავაზიარე გაზეთებში „სვობოდნაია გრუზია“ და „ასავალ-დასავალი“, აგრეთვე ბროშურაში „საქართველოს ეროვნული უმცირესობები - რეალიები და პერსპექტივები“.

   დმანისში მომხდარ ინციდენტამდე სამი კვირით ადრე კი გენერალურ პროკურატურას გავუგზავნე წერილი თხოვნით, რომ მოეხდინათ ირაკლი შოთაძესთან ჩემი შეხვედრის ორგანიზება, სადაც ვაპირებდი კონფიდენციალური ინფორმაციის მისთვის გაზიარებას, მაგრამ გენპროკურატურისგან პასუხს ვერ ვეღირსე. (თუ გენერალურ პროკურატურაში არ პასუხობენ საქინფორმის მთავარ რედაქტორსა და გენერალურ დირექტორს, ჟურნალისტსა და ჟურნალისტთა კოლექტივის ხელმძღვანელს, განა უპასუხებენ მოქალაქეებს, რომლებსაც შეხება არ აქვთ „მეოთხე ხელისუფლებასთან“, როგორც მართებულად უწოდებენ მედიას?!)

საქართველოს სახალხო დამცველო ნინო ლომჯარიავ!

საქართველოს გენერალურო პროკურორო ირაკლი შოთაძევ!

   ნუთუ არ გაინტერესებთ, რატომ არ რეაგირებენ საქართველოს შსს და სუს–ი ჩემს პუბლიკაციებზე, რატომ იგებენ ყოველთვის ყველაფერს გვიან, როგორც ამჯერადაც მოხდა, ქართველებსა და აზერბაიჯანელებს შორის ფართომასშტაბიანი შეტაკების დროს, რომლის პრეცედენტიც საქართველოში არ მახსოვს?! ნუთუ არ გაინტერესებთ, რატომ მოხდა ეს მაინცდამაინც 17 მაისს, ჰომოფობიის, ბიფობიისა და ტრანსფობიის წინააღმდეგ ბრძოლის საერთაშორისო დღეს?

თქვენ კარგად იცით, რომელი არასამთავრობო ორგანიზაციები ნთქავენ უსარგებლოდ ასტრონომიულ დასავლურ გრანტებს საქართველოში ეთნიკური უმცირესობების უფლებების დასაცავად. თქვენ კარგად იცით, რა პოლიტიკური ძალები ახდენენ სიტუაციის პროვოცირებას ქვემო ქართლსა და სამცხე–ჯავახეთში. ამავე დროს, კარგად გესმით, რომ საქართველოს ეროვნული უსაფრთხოებისთვის ეთნიკურ ნიადაგზე წარმოშობილ კონფლიქტებზე დიდი საფრთხე არ არსებობს. მაშ, რატომ ელოდებით გულხელდაკრეფილი მორიგ შეჯახებას?!

   გენპროკურორო შოთაძევ, თქვენ ხომ პრეზიდენტი სააკაშვილის დროსაც პროკურატურაში მუშაობდით და კარგად უნდა გახსოვდეთ, თუ როგორ გააძევეს მაშინ რობერტ სტურუა რუსთაველის თეატრიდან მხოლოდ იმიტომ, რომ საქინფორმთან ინტერვიუში დიდმა რეჟისორმა სრული სიმართლე თქვა - რომ სააკაშვილი სომეხია. ამით გვითხრეს, რომ სომხობა, თურმე, სირცხვილია, სომეხი - გინებაა და სომხობის დაბრალება დასჯადია! ალბათ, თქვენც, ბატონო ირაკლი, აღშფოთებული იყავით სააკაშვილი-რურუას მაშინდელი ამ გადაწყვეტილებით, მაგრამ მაღალი თანამდებობის პირი ბრძანდებოდით და რეჟიმის მესვეურების წინააღმდეგ ხომ არ წახვიდოდით?!

მაგრამ დღეს რატომ არ გჭრით ყურს სიტყვები "სომხური კარუსელი", რომელიც მუდმივად გაისმის ტელეეთერში, განსაკუთრებით – ოპოზიციის პრესკონფერენციებსა და მიტინგებზე?! სომეხთა ეროვნული ღირსების შეურაცხმყოფელი ეს გამონათქვამი ბოლოს გასულ პარასკევს, ბობოხიძისგან გავიგე, რომელმაც ტელეეთერში განაცხადა, რომ, აქაოდა, "ქართულმა ოცნებამ" შარშანდელი არჩევნები "სომხური კარუსელის" მეთოდით გააყალბაო! სწორედ იმ ბობოხიძისგან, რომელმაც პარლამენტში სხდომის დროს, საკუთარ თავს უფლება მისცა, დეპუტატი მამრაძისთვის დაუსჯელად თავში ჩაერტყა. რადგან ეს უკანასკნელი, როგორც ამბობენ, ეთნიკური სომეხია…

   გატყობინებთ, რომ არჩევნების გაყალბების მეთოდი, როდესაც ერთი და იმავე პირების ჯგუფი ავტობუსებით საარჩევნო უბნებზე ხმის მისაცემად რამდენჯერმე მიჰყავთ, გამოიგონეს არა სომხებმა, არამედ ხათუნა გოგორიშვილმა, რომელიც ზურაბ ჟვანიამ გამოზარდა "მოქალაქეთა კავშირის" ვაშლიჯვრის ოფისში სხვებთან ერთად, ვინც შემდგომ უღალატა თავის მასწავლებელს, რადგან, როგორც ამბობენ, ჟვანია სომეხი იყო. თუმცა, ამბობენ, რომ გოგორიშვილიც ეთნიკური სომეხია, მის ნამდვილ გვარსაც კი ასახელებენ, მაგრამ ეს მაინც არ წარმოადგენს საფუძველს, რომ მის გამოგონებას "სომხური" უწოდონ!

რატომ არის „კარუსელი“ მაინცდამაინც "სომხური", რატომ შეურაცხყოფენ მიზანმიმართულად სომეხ ხალხს?! რისი დამტკიცება სურთ ამით - რომ სომხები თაღლითები არიან, რომლებმაც გარყვნეს პატიოსანი ქართველები?! სხვათა შორის, ტერმინს "სომხური კარუსელი" იყენებენ არა მხოლოდ "ნაცმოძრაობის" ლიდერები, არამედ ქართველი ჟურნალისტებიც, "ექსპერტებიც" და "ქართული ოცნების" "სახეებიც" კი!

საქართველოს სახალხო დამცველო!

საქართველოს გენერალურო პროკურორო!

აღკვეთეთ არმენოფობია! მოვითხოვ თქვენგან გადაუდებელი ზომების მიღებას, რათა ამიერიდან ყველა, ვინც გამოიყენებს ტერმინს "სომხური კარუსელი" - პოლიტიკოსები, პროვოკატორები, ექსპერტები, ჟურნალისტები, აფერისტები და უბრალოდ შოვინისტები - დაისაჯონ საქართველოს სისხლის სამართლის კოდექსის თანახმად, ეთნოსთაშორისი სიძულვილის გაღვივებისთვის. როგორც სააკაშვილი ამბობდა, რომელიც, როგორც ამბობენ, სააკიანია, "მათთვის, ვისაც არ უყვარს სომხები, მე სომეხი ვარ!"

საქინფორმის მთავარი რედაქტორი და გენერალური დირექტორი
არნო ხიდირბეგიშვილი

2021 წლის 24 მაისი
საქართველო, თბილისი