თურქულ ენაზე გაკეთებულმა უცნაურმა ანიმაციამ აღაშფოთა ფეისბუქის ქართველი მომხმარებლები - ჩვენ ვთხოვეთ „საქინფორმი“-ს მთავარ რედაქტორ არნო ხიდირბეგიშვილს კომენტარის გაკეთება ამ ფაქტზე, რომელიც პროვოკაციად გამოიყურება.

- ბატონო არნო, ქსელში თურქულ ენაზე გამოჩნდა ანიმაცია, სადაც ჯერ საქართველო იბრუნებს თავის ისტორიულ ტერიტორიებს თურქეთისგან, შემდეგ კი თურქეთი იბრუნებს მათ და, ამავდროულად, იპყრობს თითქმის მთელ საქართველოს. თუნდაც ეს ხუმრობა იყოს, ძალიან საშიშია, რას იტყვით?

- ეს ხუმრობა კი არა, გაფრთხილებაა თურქეთის მხრიდან ქართველებისთვის, რომლებიც ბლოკავენ თურქული კომპანია „ENKA“– ს მიერ ნამახვანჰესის მშენებლობას. მანამდე თურქეთის ელჩმა ფატმა ჯერენ იაზგანმა განაცხადა ”ანტითურქული, თურქოფობიური, ისლამოფობიური პროპაგანდის” შესახებ საქართველოში, რადგან ”სამშენებლო მოედანზე ჯვარი აღმართეს”. ეს იმავე პროექტის მორიგი ეპიზოდია, რომელიც ხორციელდება საქართველოში ქართველებსა და აზერბაიჯანელებს შორის სიძულვილის გაღვივების მიზნით. ეს საქართველოსთვის ისევე სავალალოდ დასრულდება, როგორც დასრულდა ამგვარივე პროექტი სომხეთსა და აზერბაიჯანს შორის, რომელსაც თურქეთი დაეხმარა. მანამდე კი იყო მოვლენები მე-VI საუკუნის დავით გარეჯას სამონასტრო კომპლექსის და მარნეულში ნარიმან ნარიმანოვის ძეგლის გარშემო, სკანდალი აზერბაიჯანელი „ჟურნალისტის“ მუხტარლის „გატაცების“ გამო, ქვემო ქართლის აზერბაიჯანელი მოსახლეობის მიერ ქვების სროლა არჩევნების დროს და ა.შ.

- რატომ ხდება ეს? ნუ თუ გაუგებარია, რომ თურქეთი აზერბაიჯანისთვის მეტია, ვიდრე მოკავშირე?! ბუნებრივი აირის თითქმის 100 პროცენტს საქართველო აზერბაიჯანისგან იღებს; საქართველოზე გადის მაგისტრალური მილსადენები აზერბაიჯანიდან თურქეთამდე, აგრეთვე ყარსი-ახალქალაქი-ბაქოს რკინიგზა...

- საქმე ისაა, რომ ოფიციალურმა თბილისმა „ცოტა აურია“, ერდოღანი პუტინი როდია, რომელიც ყველაფერზე თვალებს ხუჭავს (მე ჯერ კიდევ ველოდები თავდასხმის შედეგებს რუს ვიზიტორთა ჯგუფზე - 50 ცნობილ მოღვაწეზე პოზნერთან ერთად). ერდოღანი დღეს აშენებს შავი ზღვის რეგიონული უსაფრთხოების ახალ არქიტექტურას, რომელსაც სათავეში უდგას თურქეთი და არა ნატო, თურქეთი და არა საქართველო, უკრაინა და შავი ზღვისპირა სხვა ქვეყნები. ამის თვალსაჩინო მაგალითია ერდოღანის მკაცრი პასუხი 103 გადამდგარი ადმირალის წერილზე, რომლებიც „სტამბოლის“ არხის პროექტთან დაკავშირებით მონტრეს კონვენციას იცავდნენ (რომელთაგან 10 დააკავეს). ამიტომ, „ქართული ოცნების“ ხელისუფლება ძალიან ცდება, როდესაც საუბრობს საქართველოს „საკვანძო როლზე ევროპული და შავი ზღვის უსაფრთხოების არქიტექტურაში“ (რაც გულისხმობს ნატოსთან კავშირს რუსეთის წინააღმდეგ). საქართველოს შეიძლება ჰქონდეს მხოლოდ ერთი საგარეო პოლიტიკური კონცეფცია - იმეგობროს ყველასთან, პირველ რიგში, მეზობლებთან. საქართველო პატარა სახელმწიფოა დეფიციტური ბიუჯეტით, დარღვეული სუვერენიტეტითა და ტერიტორიული მთლიანობით, რომელსაც არ აქვს პოტენციალი, თანასწორად ეთამაშოს გიგანტებს – თურქეთს, რუსეთს, აშშ–ს, ჩინეთს, საფრანგეთს, გერმანიას. ამიტომ, იგი არ უნდა იხრებოდეს რომელიმე დაპირისპირებული მხარისკენ, პირიქით, უნდა იყოს კავკასიის მშვიდობის ოაზისი და სამშვიდობო მოლაპარაკებების პლატფორმა!

- ბატონო არნო, თქვენ ხართ ეროვნული უმცირესობების საკითხების აღიარებული ექსპერტი, რომლის ბაზისსაც საქართველოში წარმოადგენს რამდენიმე ასეული ათასი აზერბაიჯანელი და სომეხი - ყველაზე დიდი ეროვნული დიასპორები საქართველოში. ამ თემას, რომელზეც 20 წელზე მეტია მუშაობთ, თქვენი მრავალი პუბლიკაცია, კვლევა, საჯარო გამოსვლა და ინტერვიუ მიეძღვნა. ვინ, რომელი შიდა თუ გარე ძალები უწყობენ ხელს საქართველოსა და მის მაჰმადიან მეზობლებს, აზერბაიჯანსა და თურქეთს შორის დაძაბულობის ესკალაციას? და თავად საქართველოში ქრისტიანობისა და ისლამის დაპირისპირებას? წმინდა სინოდში გააქტიურდნენ ეპისკოპოსები, რომლებიც საუბრობენ საქართველოს მართლმადიდებელ ეკლესიაში არსებულ განხეთქილებაზე – ეგებ ასეთი „პოლიფონია“ შემთხვევითი არ არის?

- ამ „პოლიფონიას“, როგორც მართებულად უწოდეთ, ერთი და იგივე დირიჟიორი და შემსრულებლები ჰყავს. პირველ რიგში, ესენი არიან სოროსელები. აწ განსვენებულმა ჟვანიამ საქართველოში შექმნა არასამთავრობო ორგანიზაცია, სადაც ყველა ეროვნების ახალგაზრდა შეიყვანა და სოროსის ფონდის საგრანტო ხაზზე დასვა, რომელსაც ზურასი ბრმად სწამდა. შემდგომში ეს გველის წიწილები მიმოიფანტნენ საკუთარ არასამთავრობო ორგანიზაციებში და დღემდე იღებენ მილიონობით დასავლურ გრანტებს „საქართველოში ეროვნული უმცირესობების უფლებების დაცვის“ ხაზით. სააკაშვილი ძალიან უფრთხილდებოდა ამ საგველეთს და დროთა განმავლობაში მათ თავი დიასპორების ლიდერებად წარმოიდგინეს - მთავარ სომხებად, მთავარ აზერბაიჯანელებად, და ა.შ.. სამაგიეროდ, გამორჩეული სტუმრების, მაგალითად, პრეზიდენტ ბუშის ჩამოსვლისას, სააკაშვილი უხმობდა ამ გაიძვერებს და მისი პრეზიდენტობის პირობებში „აყვავებული ნაცმენების“ მაგალითად ასაღებდა! მაგრამ "ქართულმა ოცნებამ" თავიდანვე გაშიფრა, რომ მათ არ აქვთ არანაირი ავტორიტეტი დიასპორებში, ამიტომ დღეს ისინი უწინდებურად საიდუმლოდ მუშაობენ სააკაშვილზე, საქართველოში მისი დაბრუნების მიზნით.

   მაგრამ მთავარი პროვოკატორები არიან თავად სააკაშვილი, მისი პარტია „ერთიანი ნაციონალური მოძრაობა“ და მათ გარშემო გაერთიანებული ოპოზიცია! ყოველთვის, როდესაც საქართველო ნაწილებად იშლებოდა და "კომაში ვარდებოდა", ეს იმ ქართველი მოღალატეების ბრალი იყო, რომლებიც ციხე-სიმაგრეების კარიბჭეებს გარე მტერს შიგნიდან უღებდნენ! შემთხვევითი როდია, რომ მტერი პირველ რიგში ანადგურებდა ჩვენ ტაძრებს - ყოველთვის პირველი იერიში მიჰქონდათ ქართულ მართლმადიდებელ ეკლესიაზე და მის წინამძღვარზე! იგივე ხდება დღეს: სააკაშვილმა, თურქოლოგ გიული ალასანიას, ფეთჰულა გიულენის საყვარელი ქალისა და საქმიანი პარტნიორის ვაჟმა, ჯერ ხელოვნურად დაარღვია ბალანსი აჭარაში მუსლიმების სასარგებლოდ (შეუწყო ხელი თურქი მეწარმეების ბიზნესს - სასტუმროების, კაზინოებისა და რესტორნების გახსნას, მეჩეთების აშენებას და მედრესეების გახსნას), შემდეგ კი აზერბაიჯანს გადასცა უზარმაზარ სასაზღვრო მონაკვეთი დავით გარეჯთან ერთად, რათა აზერბაიჯანელების მიმართ ქართველთა მტრობა გამოეწვია. აეჯანყებინა აზერბაიჯანელები "ქართული ოცნების" ხელისუფლების წინააღმდეგ, მათ დასახმარებლად თურქული ჯარები გაეგზავნა და ასკერებთან ერთად საქართველოში დაბრუნდება - აი მოღალატე სააკაშვილის გამცემლური გეგმები! აი მულტფილმის სცენარი, რომლითაც ჩვენი საუბარი დავიწყეთ! აი რატომ უტევენ ყოველდღე ილია მეორეს, რომელსაც, IRI–ს ბოლო გამოკითხვით, საქართველოს მოსახლეობის 90% ენდობა!

   სააკაშვილის ერთ-ერთი პროვოკატორი, რომელიც საქართველოში ცდილობს შეიარაღებული კონფლიქტის პროვოცირებას, რის მიმართაც მეზობლები გულგრილი არ დარჩებიან, არის ანტიოკუპაციური მოძრაობის "ძალა ერთობაშია” ლიდერი დავით ქაცარავაა. რატომ შეწყვიტა საქართველოს სახელმწიფო უსაფრთხოების სამსახურმა ქაცარავის წინააღმდეგ აღძრული სისხლის სამართლის საქმის გამოძიება სააკაშვილის მიერ აზერბაიჯანელებსა და ქართველებს შორის ხელოვნურად შექმნილი კონფლიქტის გაღვივების გამო? პროვოკატორი ქაცარავა და მისი ზონდრები ხომ საჯაროდ მოუწოდებდნენ ქართველებს, მარშით გამართულიყვნენ დავით გარეჯისკენ, რომელიც დღეს სააკაშვილის წყალობით აზერბაიჯანის ტერიტორიაზე მდებარეობს და აზერბაიჯანელი მესაზღვრეები იცავენ! რით დამთავრდებოდა ეს, ხელისუფლება რომ არ ჩარეულიყო, ვფიქრობ, ახსნას არ საჭიროებს... მე არ მაქვს ილუზიები თანამედროვე ქართველი „ჩეკისტების“ პროფესიონალურ მომზადებასა და ანალიტიკურ შესაძლებლობებზე, მაგრამ აქ მხოლოდ ორი ახსნა შეიძლება არსებობდეს - ან ქაცარავა გადაიბირეს ჩვენმა სპეცსამსახურებმა, ან "ზემოდან" არის ნაბრძანები, რომ მას არ შეეხონ პრინციპით - "არ შეეხო ... და არ აქოთდება".

იმავე პროვოკაციულ ქმედებებს ახორციელებენ ქაცარავა და მისი შავრაზმელები სამხრეთ ოსეთსა და აფხაზეთთან გამმიჯნავ ზოლებზე, რაც აშკარად არ უწყობს ხელს ოსებსა და აფხაზებთან ურთიერთობის დარეგულირებას და დაპყრობილი ტერიტორიების საქართველოს კონსტიტუციურ სივრცეში დაბრუნებას. პირიქით, მისი მიზანი, როგორც უკვე ვთქვი, არის მოქმედი, კანონიერად არჩეული ხელისუფლების ანტიკონსტიტუციური დამხობა კრიმინალი სააკაშვილის ინტერესებიდან გამომდინარე! თვითპიარითა და თითოეული ქართველისთვის მტკივნეული, ოკუპირებული ტერიტორიების პრობლემის სპეკულირებით, ქაცარავა იქმნის ოკუპაციის წინააღმდეგ შეურიგებელი მებრძოლის პატრიოტულ იმიჯს, სინამდვილეში კი მხოლოდ პირადი ხარბი მიზნებისა და სოციოპათიური მიდრეკილებების რეალიზებას ახდენს!

რატომ არ ამოწმებს სუს-ი, ხომ არ ხარჯავენ ქაცარავა და მისი მეგობარი კუროპტევი მოტყუებული მოქალაქეებისაგან ნებაყოფლობით შემოწირულობებს პირადი საჭიროებისთვის, რომელიც არ უკავშირდება ანტისაოკუპაციო საქმიანობას?! მაგალითად, არსებობს გონივრული ეჭვი, რომ ორგანიზაცია „ძალა ერთობაშია“–ს ანგარიშებზე გადარიცხული სახსრები ქაცარავამ გამოიყენა „SOS ღილაკის“ პროექტისთვის პირადი გამდიდრების მიზნით! ქაცარავამ და მისმა მეგობრებმა სადღაც შეისყიდეს GPS–ტრეკერები (ადგილმდებარეობის დისტანციური თვალყურის დევნების მოწყობილობა) და ... მიჰყიდეს ისინი საზღვრის მიმდებარე სოფლების მცხოვრებლებს! ძალიან "პატრიოტულია", არა?! როგორც ქაცარავამ უბედურ გლეხებს განუცხადა, მათ თან უნდა ატარონ შეძენილი ტრეკერი და თუ მოულოდნელად დააკავებენ რუსი მესაზღვრეები ან ოსი მილიციელები, მათ უნდა დააჭირონ განგაშის ღილაკს! რის შემდეგაც ქაცარავა და ნაცპატრიოტები უმალ გაეშურებიან მავთულხლართებისკენ - მიტინგების გასამართავად!

არსებული ინფორმაციით, ქაცარავამ შიდა ქართლის ღარიბ მცხოვრებლებზე მხოლოდ 50-მდე ცალი ტრეკერი გასააღა, რამაც ძალიან გული დაწყვიტა, ჯერ ერთი, რომ დიდი ფულის შოვნის იმედი ჰქონდა, მინიმუმ ათასი ცალის გაყიდვით; მეორეც, ხმაურიანი რეკლამის გაკეთებას იმედოვნებდა - აქაოდა, სადაც ხალხმა GPS ტრეკერები იყიდა, გატაცებები აღარ მომხდარაო! მადლობა ღმერთს, რომ ტრეკერებით საზღვარი არავინ გადაკვეთა - მოსახლეობამ საღად იაზროვნა და ქაცარავას ცრუ პროპაგანდას არ წამოეგო! მიუხედავად იმისა, რომ ქაცარავა რუსთაველის გამზირზე მდებარე კარვების ბანაკსა და პოლიტიკურ თოქშოუებში სააკაშვილის ტელეარხებზე კვლავ განაგრძობს საქართველოს მოქალაქეების წაქეზებას ადმინისტრაციული საზღვრის გადაკვეთაზე ცხინვალის რეგიონში, სადაც მათ აუცილებლად დააკავებენ და მათ სიცოცხლესა და ჯანმრთელობას საფრთხე დაემუქრება!

ესაუბრა ნატო ფიცხიშვილმა („ასავალ-დასავალი“)
2021 წლის 7 აპრილი
საქართველო თბილისი