აქტუალური
მმართველ პარტიასა და ოპოზიციას შორის მოლაპარაკებების ფორმატი შესაძლოა შეიცვალოს

 საქართველო, 6 აპრილი, საქინფორმი. მმართველ პარტია „ქართულ ოცნებასა“ და ოპოზიციას შორის მოლაპარაკებების ფორმატი შეიძლება შეიცვალოს – ასეთ შესაძლებლობას არ გამორიცხავენ მხარეები, რომლებიც უკვე ხუთ თვეზე მეტია, შეთანხმებას ვერ ახერხებენ.

მოლაპარაკებების მორიგი რაუნდი, რომელიც საქართველოში კრიზისის მოგვარებას ითვალისწინებდა, გასულ კვირაში შედგა და კვლავ უშედეგოდ ჩაიარა. პოლიტიკური ჩიხიდან ქვეყნის გამოსაყვანად თბილისს მეორედ ეწვია ევროპული საბჭოს პრეზიდენტის სპეციალური წარმომადგენელი კრისტიან დანიელსონი, მაგრამ მისი შეთავაზებული წინადადებები მხარეებმა არ მიიღეს.

საპარლამენტო უმრავლესობის წევრი მიხეილ სარჯველაძე ოპოზიციას მოუწოდებს, შეცვალოს დამოკიდებულება, რათა მოლაპარაკებების პროცესს შედეგი ჰქონდეს.

რაც შეეხება ფორმატს, როგორ წარიმართება მოლაპარაკებები, ნებისმიერი ფორმა ამ შემთხვევაში უნდა მიესადაგოს მოლაპარაკებების წარმატებულად წარმართვის შესაძლებლობებს. ამ თვალსაზრისით ფორმებზეც საფიქრალი გვექნება, მათ შორის ჩვენ უცხოელ პარტნიორებთან ერთად“, – განაცხადა სარჯველაძემ.

ამასთან, ოპოზიციური პარტია „სტრატეგია აღმაშენებლის“ წევრი სერგო ჩიხლაძე მიიჩნევს, რომ მოლაპარაკებების გაგრძელების იმედი რჩება, თუმცა შვედი დიპლომატის მიერ წარმოდგენილი დოკუმენტი უნდა დამუშავდეს.

დოკუმენტი დასახვეწია, კიდევ არის სამუშაო, რა სახით გაგრძელდება მოლაპარაკებები“, – განაცხადა ჩიხლაძემ.

დანიელსონის მიერ წარმოდგენილ კომპრომისულ დოკუმენტს ხელი არც ოპოზიციამ და არც ხელისუფლებამ არ მოაწერა. შეთანხმება მხოლოდ ხუთიდან სამ პუნქტზე შედგა: საარჩევნო რეფორმა, სასამართლო რეფორმა, ხელისუფლების განაწილება პარლამენტში. მხარეებმა კონსენსუსს ვერ მიაღწიეს ორ საკითხში – „პოლიტპატიმრების“ გათავისუფლება და ქვეყანაში ვადამდელი საპარლამენტო არჩევნების ჩატარება.

„ერთიანი ნაციონალური მოძრაობის“ ერთ–ერთი ლიდერის, ხატია დეკანოიძის თქმით, მოლაპარაკებების მესამე ეტაპის დაწყების შემთხვევაში ოპოზიციის მოთხოვნები არ შეიცვლება. მისი თქმით, ისინი დარწმუნებული არიან, რომ საერთაშორისო ორგანიზაციების ზეწოლა მმართველ პარტიაზე გაძლიერდება.

იმ შემთვევაში თუ, მესამე ეტაპი იქნება, ჩვენი მოთხოვნები რჩება იგივე, პოლიტიკური პატიმრების გათავისუფლება და ვადამდელი არჩევნების ჩარჩოზე შეთანხება“, – განაცხადა დეკანოიძემ.

საპარლამენტო არჩევნებიდან ხუთი თვის შემდეგ ოპოზიციის ნაწილი კვლავ უარს ამბობს მისი შედეგების აღიარებაზე და ახალი კენჭისყრის დანიშვნას მოითხოვს. ხელისუფლება ამ საკითხს კი „წითელ ხაზად“ მოიაზრებს, არჩევნების გაყალბებაზე ბრალდებას უსაფუძვლოდ მიიჩნევს და მოლაპარაკებების დროს ოპოზიციას ყურადღების სხვა საკითხებზე გადატანას სთავაზობს.

ოპოზიციის კიდევ ერთი პრინციპული მოთხოვნაა იმ პირთა გათავისუფლება, რომლებსაც ისინი „პოლიტპატიმრებს“ უწოდებენ. ესენი არიან „ნაცმოძრაობის“ ლიდერი ნიკა მელია და ტელეარხ „მთავარი არხის“ მფლობელი გიორგი რურუა.

დასავლელი შუამავლები უკვე რამდენიმე თვეა საქართველოში ვითარებაზე გავლენის მოხდენას ცდილობენ, თუმცა ჯერჯერობით უშედეგოდ – პოლიტიკური კრიზისი უფრო ღრმავდება.

Sputnik-Georgia