ლიტვის საელჩოს ორგანიზატორობით საქართველოში და ეროვნული კინოცენტრის პარტნიორობით 3-8 მაისს თბილისის კინოს სახლ „ქოლგასა“ და ვაკის პარკში მდებარე კლუბ „33ა“-ში გაიმართება თანამედროვე ლიტვური ფილმების ჩვენება, სადაც წარმოდგენილი იქნება ლიტვაში გასული 20 წლის განმავლობაში შექმნილი 16 მხატვრული, დოკუმენტური და მოკლემეტრაჟიანი ფილმი. პროგრამა ასახავს ისტორიული ცვლილებების ფონზე ლიტვური კინემატოგრაფიის აღორძინების პროცესს.

ქართველ საზოგადოებას პირველად ექნება საშუალება, არა მარტო იხილოს ლიტვური კინო, არამედ უშუალოდ შეხვდეს მის შემქმნელებსაც. პროგრამაში წარმოდგენილია, ასევე, ბოლო პერიოდის ლიტვური კინოს წამყვანი რეჟისორის, დამოუკიდებელი არტ ჰაუზის ერთ-ერთი ყველაზე ცნობილი წარმომადგენლის – შარუნას ბარტასის ფილმები. ასევე, ნაჩვენები იქნება არუნას მატელისის დოკუმენტური ფილმი „დედამიწაზე დაბრუნებამდე“ („Before Flying Back to Earth“) და კრისტინა ბუოჟიტეს მხატვრული ფილმი „კოლექციონერი“ („The Collectress“), სხვა ცნობილი ლიტველი კინორეჟისორების – რაიმუნდა ბანიონისის, ტომას დონელას, ვიტაუტას ლანდსბერგისის, ემილის ველივისისა და სხვათა შემოქმედება.