სამართალი
კუდ-მა ეროვნული ჩემპიონატის ფარგლებში „გაყიდული მატჩები“ გამოააშკარავა
კონსტიტუციური უსაფრთხოების დეპარტამენტის თანამშრომლებმა მიღებული ოპერატიული ინფორმაციის საფუძველზე ტოტალიზატორების შავი ბიზნესის წამომადგენლებთან საქართველოს ეროვნულ ჩემპიონატში მონაწილე საფეხბურთო კლუბების კორუფციული გარიგებები გამოავლინეს.
კერძოდ, როგორც შსს იტყობინება, საფეხბურთო კლუბ „სამტრედიის“ კაპიტანი სპარტაკ გოგია, ფეხბურთელი კახაბერ კირთაძე, ზუგდიდის „ბაიას“ კაპიტანი როინ ონიანი, ფეხბურთელი ლევან ვართაგავა, თბილისის „ვიტ-ჯორჯიას“ ფეხბურთელი გიგა ბეჭვაია სისტემატურად შედიოდნენ ფარულ გარიგებაში ტოტალიზატორის შავი ბიზნესის წარმომადგენელ დავით გაბედავასთან და დიდი ოდენობით თანხების სანაცვლოდ, წინასწარ ხელოვნურად განსაზღვრავდნენ თამაშების შედეგებს.
კუდ-მა შემდეგი თამაშები გამოავლინა: 2011 წლის 15 აპრილს გამართული სამტრედიისა და ბოლნისის „სიონის“ მატჩი, რომელშიც სამტრედიის გუნდმა აიღო 15 000 ლარი; 2011 წლის 19 აპრილს ჩატარებული თბილისის „დინამოსა“ და ზუგდიდის „ბაიას“ მატჩი, რომელშიც „ბაიას“ გუნდმა აიღო 12 000 ლარი; 2011 წლის 30 აპრილს ჩატარებული „ვიტ-ჯორჯიასა“ და „სიონის“ მატჩი, რომელშიც „ვიტ-ჯორჯიას“ გუნდმა აიღო 20 000 ლარი.
ძიება გრძელდება, გამოძიებას კონსტიტუციური უსაფრთხოების დეპარტამენტი აწარმოებს.
