„დემოკრატიული მოძრაობა – ერთიანი საქართველოს“ ლიდერი ნინო ბურჯანაძე აცხადებს, რომ 2 მაისს „სახალხო კრება“ საპროტესტო აქციების დაწყების თარიღს გაახმიანებს.

გაზეთ „რეზონანსისთვის“ მიცემულ ინტერვიუში, რომელიც 29 აპრილს გამოქვეყნდა, ბურჯანაძემ განაცხადა, რომ, როგორც „სახალხო კრებამ“ მარტში გამართულ შეკრებაზე გადაწყვიტა, 2 მაისს მოძრაობა მშვიდობიანი საპროტესტო აქციებისთვის სამოქმედო გეგმის ძირითად მიმართულებებს გამოაქვეყნებს.

მისი თქმით, ბოლო თვეების განმავლობაში „სახალხო კრება“ აქტიურ კამპანიას აწარმოებდა რეგიონებში, სადაც ქვეყნის ყველა კუთხეში კარგად ორგანიზებული აქტივისტთა ჯგუფები შექმნა.

„სახალხო კრებას ეს თვეები დასჭირდა იმისთვის, რომ შეგვექმნა ძალიან სერიოზული მოძრაობა, სადაც კომპონენტების სახით, ერთად აღებული შედის ჩვენი სიმართლე, ხალხის ძალიან დიდი რაოდენობა, ორგანიზებული ადამიანები და სწორი ხედვა. ეს აუცილებლად მოგვცემს შედეგს და დავიბრუნებთ კონსტიტუციურ უფლებებს, აღვადგენთ ელემენტარულ სამართლიანობას და მივაღწევთ იმას, რომ ხელისუფლება აუცილებლად წავა“, – განაცხადა ბურჯანაძემ.

მისი თქმით, საპროტესტო აქციების დაწყების თარიღი არ იქნება „ძალიან შორს 2 მაისიდან“.

ბურჯანაძემ, ასევე, განაცხადა, რომ მას კონსულტაციები აქვს რამდენიმე ოპოზიციურ პარტიასთან, რომლებიც მან არ დააკონკრეტა, და დასძინა, რომ სახალხო მოძრაობა მზად არის, ნებისმიერ ოპოზიციურ პარტიასთან ითანამშრომლოს, „ვისაც რეალურად უნდა ამ ხელისუფლების წინააღმდეგ ბრძოლა“.