როგორც ცნობილია, სულ ცოტა ხნის წინათ ტელეკომპანია „მაესტროსა“ და რადიო „ნაცნობის“ ერთობლივი მემორანდუმის ფარგლებში ტელეკომპანიის აქციათა 50% მომღერალ გია გაჩეჩილაძეს (უცნობს) გადაეცა.
როგორც მაშინ „მაესტროს“ გენერალურმა დირექტორმა ილია კიკაბიძემ განაცხადა, „თავისუფალი სიტყვის გაძლიერებისთვის ტელეკომპანია „მაესტროსა“ და რადიო „ნაცნობს“ შორის დაიდო შეთანხმება, რომლის მიხედვით, რადიო „ნაცნობი“ როგორც რადიო „მაესტრო“, ტრანსფორმირდება, ტელეკომპანიის აქციათა 50% კი, 2006 წელს მიღებული შეთანხმების საფუძველზე, გია გაჩეჩილაძეს გადაეცემა“.

საქინფორმის ინფორმაციით, ტელეკომპანიის აქციათა 50%-ის მფლობელი 10-მდე ადამიანი იყო, 50%-ს კი სწორედ გია გაჩეჩილაძე ფლობდა, თუმცა სულ ცოტა ხნის წინათ „უცნობმა“ საკუთარი წილის ნახევარი (25%) დიზაინერ მაკა ასათიანს მიჰყიდა.

საქინფორმი საკითხის გარკვევას ტელეკომპანიაში შეეცადა, თუმცა „მაესტროს“ საინფორმაციო სამსახურის დღის გამოშვებების პროდიუსერი ლელა გაბეჩავა აღნიშნულთან დაკავშირებით ინფორმირებული არ აღმოჩნდა. რაც შეეხება „მაესტროს“ გენერალურ დირექტორ ილია კიკაბიძეს, გაბეჩავას განმარტებით, ის ქვეყანაში არ იმყოფება, რის გამოც მასთან დაკავშირება ვერ მოხერხდება.

საქინფორმის წყარო ვერ აკონკრეტებს, თუმცა არ გამორიცხავს, რომ კიკაბიძე საზღვარგარეთ სწორედ აღნიშნული საკითხის მოსაგვარებლად წავიდა. „ერთი რამ დანამდვილებით შემიძლია, გითხრათ, „მაესტროს“ აქციების 25% მაკა ასათიანს გადაეცა“, – აცხადებს წყარო.