საზოგადოება
ჯონ ბასი: „საქართველოში ინტელექტუალური საკუთრების დაცულობის კუთხით გასაკეთებელი გაკეთებულზე მეტია“
როგორც საქართველოში აშშ-ის ელჩმა ჯონ ბასმა დღეს ჟურნალისტებთან საუბრისას განაცხადა, „ინტელექტუალური საკუთრების უფლების დაცულობის უზრუნველსაყოფად აშშ საქართველოს მთავრობასთან წლების განმავლობაში მუშაობს, თუმცა ამ კუთხით დიდი პროგრესი არ შეინიშნება და გასაკეთებელი გაკეთებულზე მეტია... აქედან გამომდინარე, საქართველოს მთავრობასა და ბიზნესის წარმომადგენლებთან აქტიურ თანამშრომლობას ვაგრძელებთ, რათა მოქალაქეების შემოქმედებითი ნიჭი გამოხატული იქნეს და მსოფლიოში მის პატივისცემას შევუწყოთ ხელი“.
აღსანიშნავია, რომ ინტელექტუალური საკუთრების დაცვის გაძლიერებისა და კომპიუტერულ პროგრამებზე საავტორო უფლებების დარღვევის ხვედრითი წილის შემცირების მიზნით საქართველოში მოქმედებას კომპანია „ბიზნეს სოფტვეარ ალიანსი“ იწყებს.
ამის შესახებ დღეს გამართულ პრესკონფერენციაზე კომპანიის საქართველოს ოფისის ხელმძღვანელმა ჯორჯ ბერნელდენმა განაცხადა. ღონისძიებას საქართველოს ფინანსთა მინისტრის მოადგილე რუსუდან კემულარია, აშშ-ის სავაჭრო-სამრეწველო პალატის პრეზიდენტი დევიდ ლი, აშშ-ის ელჩი საქართველოში ჯონ ბასი, „Microsoft“-ის საქართველოს წარმომადგენლობის ხელმძღვანელი დავით ასათიანი და „საქპატენტის“ დირექტორი ირაკლი ღვალაძე ესწრებოდნენ. დღესვე მხარეებს შორის თანამშრომლობის მემორანდუმიც გაფორმდა.
