მოსკოვის „გაღიზიანება“ საქართველოს ნატოსთან ახლო კავშირებზე „ბუნებრივია“, რადგან, „სამწუხაროდ“, ჯერ კიდევ არ შეცვლილა „მოსკოვის პოლიტიკურ ხელმძღვანელობაში ფუნდამენტური მიდგომა საქართველოს, ისევე, როგორც მეზობლების, მათი სუვერენიტეტისა და თავისუფლების მიმართ“, – განაცხადა ეროვნული უშიშროების საბჭოს მდივანმა გიგა ბოკერიამ.

„სანამ ეს, სამწუხაროდ, ასეა, ყველა ნაბიჯი, რომელსაც საქართველო გადადგამს იმ მიმართულებით, რომ იყოს უფრო დაახლოებული ევროატლანტიკურ სივრცესთან, იყოს უფრო დაცული, გამოიწვევს გაღიზიანებას, – განაცხადა მან და დასძინა, – ჩვენ იმედი გვაქვს, რომ ეს დამოკიდებულება შეიცვლება“.

მისი თქმით, მოსკოვი „ჯერჯერობით“ ინარჩუნებს „აბსოლუტურად არალეგიტიმურ პოზიციას“ ცეცხლის შეწყვეტის შეთანხმებით აღებული ვალდებულებების, მათ შორის, საქართველოს „დეოკუპაციის“ მიმართ, რის „დემონსტრირებაც მოახდინეს ამ ბოლო განცხადებით“.