სამართალი
გოგა ხაინდრავა - ანდრიუს კუბილიუსს: ბატონო კუბილიუს, იყენებთ რა ევროპარლამენტარის მაღალ სტატუსს, ფაქტობრივად აშანტაჟებთ ქართულ საზოგადოებას

 საქართველო, 3 აგვისტო, საქინფორმი. გოგა ხაინდრავა ევროპარლამენტის დეპუტატს, ანდრიუს კუბილიუსს გიორგი რურუას, გიგი უგულავას და ირაკლი ოქრუაშვილის პოლიტპატიმრად მოხსენიების გამო აკრიტიკებს.

კინორეჟისორი აცხადებს, რომ ევროპარლამენტარს საქართველოში ე.წ. პოლიტპატიმრებზე საუბრისას მეტი პასუხისმგებლობა მართებს, რადგან გიორგი რურუას, გიგი უგულავას და ირაკლი ოქრუაშვილის პოლიტპატიმრად მოხსენება საზოგადოებისთვის მიუღებელია.

ხაინდრავამ მიმართვაში ყურადღება გაამახვილა დასავლური პარტნიორების ფინანსურ ინსტიტუტებზეც და აღნიშნა, რომ საქართველოს მოსახლეობისთვის გამოყოფილი დახმარების შეჩერებით მანიპულირება დაუშვებელია. გოგა ხაინდრავამ კუბილიუსს ღია წერილით მიმართა.

ბატონო კუბილიუს! თქვენ, როგორც ყოფილი საბჭოთა კავშირის ყოფილ მოქალაქეს, კარგად უნდა გახსოვდეთ, როგორ სჯიდა ბოლშევიკური რეჟიმი საბჭოთა იმპერიის მიერ დაპყრობილ ქვეყნებში და სახელდობრ ლიეტუვაში, სამშობლოს დამოუკიდებლობისთვის მებრძოლ პატრიოტებს, როგორ სწამებდა მათ ცილს, რაცხავდა მათ კრიმინალებად და მრავალი წლით „გულაგის“ საპატიმროებში აგზავნიდა. ამ ადამიანების, დისიდენტების თავგანწირვამ, ათწლეულობით გადატანილმა ტანჯვამ და დაუღალავმა ბრძოლამ მოგცათ შესაძლებლობა თქვენ და ბევრ თქვენს კოლეგას ყოფილი სოციალისტური ბანაკის ქვეყნებიდან, რათა ბრძანდებოდეთ დღეს გაერთიანებული ევროპის პარლამენტის წევრები და იყენებდეთ ამ პოლიტიკური ინსტიტუტის მაღალ ტრიბუნას საჯარო გამოსვლებისთვის. ეს დიდი პრივილეგიაა პოლიტიკოსისთვის, თუმცა ამავდროულად დიდი პასუხისმგებლობაც, განსაკუთრებით იმ ადამიანების სულების წინაშე, ვინც ამ დიადი მიზნისთვის, იცხოვრა თავისუფალ, დემოკრატიულ სამყაროში, საკუთარი ცხოვრება და ხშირ შემთხვევაში სიცოცხლეც გასწირა! მინდა, მოგაგონოთ მხოლოდ რამდენიმე მათგანის სახელი (ბოდიშს ვიხდი, მაგრამ მათ სრულ ჩამონათვალს ვერც ერთი წერილი ვერ დაიტევს): კარდინალი სიგიტას ტამკიავიჩუსი, ლიეტუვის ჰელსინკის ჯგუფის წევრები კაროლის გარუცკასი, ვიკტორას პიატკუსი, ტომას ვენცლოვა, თავისუფალი ლიეტუვის ლიგის დამაარსებელი ანტანას ტერლიაცკისი... ეს ადამიანები და მათი თანამებრძოლები, ქართველები მერაბ კოსტავა, გიორგი ჭანტურია, სომეხი პარუირ აირიკიანი და რუსი ვლადიმირ ბუკოვსკი პოლიტპატიმრები იყვნენ! ჭეშმარიტი პოლიტპატიმრები! კომუნისტური რეჟიმის მიერ კრიმინალებად შერაცხულები! და არა პოლიტიკას ამოფარებული კრიმინალები, რომელთაც თქვენ და ზოგიერთი თქვენი კოლეგა, დღეს, გაერთიანებული ევროპის ეპოქაში, „პოლიტპატიმრებად“ ასაღებთ! რითაც შეურაცხჰყოფთ სამშობლოს დამოუკიდებლობისთვის თავდადებულთა წმინდა ბრძოლასა და მათ ნათელ ხსოვნას!

თქვენ, ბატონო კუბილიუს, უკვე როგორც ევროკავშირის მოქალაქე და ევროპარლამენტის დეპუტატი, „პოლიტპატიმრებად“ რაცხავთ სისხლის სამართლის დამნაშავეებს, ვისაც საკუთარ ქვეყანაში, საქართველოში, ბრალი მიუძღვით უმძიმეს კრიმინალურ დანაშაულებებში და ეს მათი ბრალი დადასტურებილია სუვერენული ქვეყნის სასამართლოს მიერ. მეტიც, ეს ადამიანები წარმოადგენენ სწორედ იმ რეჟიმს, რომლის მიმართ სტრასბურგის ადამიანის უფლებათა სასამართლოს გამოტანილი აქვს არა ერთი ვერდიქტი, სადაც პარტია „ნაციონალური მოძრაობის“ ხელისუფლების უმაღლესი რანგის წარმომადგენლები იმხილებიან სისტემურ, უმძიმეს დანაშაულებებში, ისეთებში, როგორიც არის წამება, პატიმრების მიმართ არაადამიანური მოპყრობა, მკვლელობები, გატაცებები, ბიუჯეტის ქურდობა, რეკეტი, სხვისი ქონების ძალადობრივი მითვისება! რის გამო, ჩვენ, საქართველოს მოქალაქეები, გადასახადების გადამხდელები იძულებულები ვართ, საერთაშორისო სასამართლოს მიერ დაკისრებული ჯარიმების სახით, მილიონობით ლარი გადავუხადოთ დაზარალებულების და მიცვალებულების ოჯახებს, რაც სამართლიანია! ეს განაჩენები და სტატისტიკა ადვილად ხელმისაწვდომია, მით უმეტეს ევროპარლამენტარებისთვის, მხოლოდ მონდომება და პოლიტიკური კეთილსინდისიერება არის საჭირო მათ გასაცნობად.

თქვენ, ბატონო კუბილიუს, იყენებთ რა ევროპარლამენტარის მაღალ სტატუსს, ფაქტობრივად აშანტაჟებთ ქართულ საზოგადოებას და მის მიერ არჩეულ ხელისუფლებას, როდესაც დაჟინებით მოითხოვთ, „პოლიტპატიმრების“ (სინამდვილეში სისხლის სამართლის დამნაშევეების) გიგი უგულავას, ირაკლი ოქრუაშვილისა და ჟორიკა რურუას განთავისუფლებას. გვემუქრებით რა, ევროპის ფინანსური ინსტიტუტების მიერ, ამ საერთო საკაცობრიო უბედურების, პანდემიის ჟამს, ჩვენი ქვეყნის მოსახლეობისთვის გამოყოფილი დახმარების შეჩერებით?!

მინდა დაგარწმუნოთ, რომ ეს თქვენი საქციელი შესაბამისად არის შეფასებული ქართული საზოგადოების მიერ. ჩვენ, საქართველოს მოქალაქეებმა, როგორც არავინ მსოფლიოში, კარგად ვიცით, რა აქვთ ჩადენილი და რას წარმოადგენენ, თქვენთვის „პოლიტპატიმრები“ და ჩვენთვის კრიმინალები რურუა, უგულავა და ოქრუაშვილი. ასევე გარწმუნებთ, რომ თქვენ ამომრჩევლებსაც ლიეტუვაში, კოლეგებს და ოპონენტებს ევროპარლამენტში, აუცილებლად ეცოდინებათ ვის ქომაგობთ თქვენ საქართველოში. აი რა მიზნით და რა მიზეზით, ამის ახსნა მათთვის, თქვენთვის მომინდია“, - აცხადებს ხაინდრავა წერილში.