საქართველო, 30 ივნისი, საქინფორმი. უკვე მერამდენე წელია, რაც ქართველი "დონ კიხოტი" ფუჭად ამტვრევს შუბებს კრემლის კედლებზე - "ოკუპანტების" ციტადელზე, და ვერ ხვდება რომ ქარის წისქვილებს ებრძვის. ახალგაზრდა თაობებმა, რომლებმაც არ უსწავლიათ მარქსიზმ-ლენინიზმი უნივერსიტეტებში, არაფერი იციან ბაზისსა და ზედნაშენზე და რომ ეკონომიკა კონცენტრირებული პოლიტიკაა. საქინფორმი მკითხველის ყურადღებას ამახვილებს იმაზე, რომ საქართველოს სტრატეგიული პარტნიორი №1 წარმატებით აიარაღებს საქართველოს და აშენებს სამხედრო ინფრასტრუქტურას, მაგრამ საქართველოში აშშ–ის ყველა ეკონომიკურ პროექტს ცუდი ბედი აქვს! სამაგიეროდ, "აგრესორი" - რუსეთი - წარმატებით და ღრმად არის ჩანერგილი საქართველოს ეკონომიკის ყველა სფეროში, მათ შორის ყველაზე სტრატეგიულ, ენერგეტიკის სექტორში.

გავიხსენოთ - ამერიკელები ფლობდნენ ენერგოგამანაწილებელ კომპანიას, რომელიც დედაქალაქის ელექტროქსელს - „თელასს” მართავდა, მაგრამ ის რუსებს მიჰყიდეს; ანაკლიის ღრმაწყლოვანი პორტის მშენებლობის კონსორციუმი, ამერიკული კომპანიების მონაწილეობით, გასკდა, ხოლო „ფრონტერამ“, გარდა სკანდალებისა, საქართველოში არაფერი აწარმოა. ამავდროულად, საქართველოში ასობით რუსული კომპანია ყვავის და ინვესტიციებს აბანდებს და ნებისმიერ იდეოლოგიაზე უკეთესად აკავშირებს საქართველოს რუსეთთან. ეს განსაკუთრებით ეხება ელექტროქსელებს, რომელთაც გადაჭარბების გარეშე შეიძლება ეწოდოს პოლიტიკური და რომლებიც საქართველოს აკავშირებს არა მხოლოდ რუსეთთან, არამედ სეპარატისტულ რეგიონებთანაც - აფხაზეთთან ენგურის ჰიდროელექტროსადგური) და სამხრეთ ოსეთთან. წყლის რესურსებით მდიდარი საქართველო ასევე აწვდის ელექტროენერგიას სომხეთს, ზამთარში სანაცვლოდ იღებს ელექტროენერგიას სომხეთის ატომური ელექტროსადგურებიდან, ასევე ყიდის ელექტროენერგიას თურქეთში.

როგორც ჩანს, რეკონსტრუქციისა და განვითარების ევროპულმა ბანკმა (EBRD) სწორედ ზემოაღნიშნულ გარემოებებზე გაამახვილა ყურადღება საქართველოში.

ენერგეტიკული ქსელის გაძლიერების პროექტი საქართველოსთვის ძალიან მნიშვნელოვანია და ქვეყნის მასშტაბით ელექტრონული ქსელის მოდერნიზებას გულისხმობს, – ამის შესახებ კავკასიაში ევროპის რეკონსტრუქციისა და განვითარების ბანკის (EBRD) რეგიონულმა დირექტორმა კატარინა ბიორლინ ჰანსენმა განაცხადა.

როგორც მან აღნიშნა, უპირველესად ეს მნიშვნელოვანია, ელექტრონული ქსელების ეფექტიანობისთვის, რაც მოსახლეობისთვის ელექტროენერგიის მიწოდებას უზრუნველყოფს.

„ასევე, პროექტი ძალიან მნიშვნელოვანია ინვესტორებისთვის, რომლებიც დაინტერესებულნი არიან ინვესტირებით განახლებად ენერგიაში, რადგან ელექტროსისტემას ექნება შესაძლებლობა, მიიღოს ჰიდროელექტროსადგურების, ასევე, ქარისა და მზის სადგურების მიერ წარმოებული ელექტროენერგია. ძალიან მოხარული და ამაყი ვართ, რომ ხელი მოვაწერეთ აღნიშნულ შეთანხმებას და ველით მჭიდრო თანამშრომლობას საქართველოსთან აღნიშნული პროექტის დანერგვის მიზნით“, – განაცხადა კატარინა ბიორლინ ჰანსენმა.

საქართველოსა და ევროპის რეკონსტრუქციისა და განვითარების ბანკს (EBRD) შორის შეთანხმება გაფორმდა, რომელიც საქართველოს ენერგეტიკული ქსელის გაძლიერებისა და გაუმჯობესების მიზნით, 90 მლნ ევროს ოდენობის ფინანსური რესურსის გამოყოფას ითვალისწინებს.