საარჩევნო მარათონს ჩვენში, ფაქტობრივად, NDI-მ სტარტი უკვე მისცა. ამერიკულმა საერთაშორისო საქმეთა ეროვნულ-დემოკრატიულმა ინსტიტუტმა საარჩევნო წელიწადი გახსნა და საჯარო გახადა პარტიული კვლევის რეზულტატი, პოლიტიკური სუბიექტების შედეგები, მოლოდინები და სამომავლო პერსპექტივა.

NDI-ს მიერ ჩატარებული კვლევის მიხედვით გამოდის, რომ პარტიული რეიტინგით პირველ ადგილზე „ნაციონალური მოძრაობა“ გავიდა, მეორეზე – ქრისტიან- დემოკრატიული მოძრაობა, ხოლო მესამეზე – „თავისუფალი დემოკრატები“.
„ნაციონალური მოძრაობის“ განცხადებით, გამოკითხულთა 52 პროცენტმა ხმა ნაციონალებს მისცა. ქრისტიან-დემოკრატების ცნობით კი, კვლევის შედეგები ჯერ არ მიუღიათ, თუმცა იციან, რომ მეორე ადგილი დაიკავეს.
გიორგი თარგამაძის გუნდი კვლევის შედეგებს NDI-ს ოფისში გაეცნო. იქვე ნახეს შედეგები „რესპუბლიკურმა პარტიამ“, „ეროვნულმა ფორუმმა“ და „ახალმა მემარჯვენეებმა“.
„თავისუფალი დემოკრატების“ თქმით კი, ისინი მესამე ადგილზე გავიდნენ.
რაც შეეხება დანარჩენ პარტიებს, NDI-ს კვლევის შედეგები მათ მოგვიანებით მიუვათ.
„ეროვნული საბჭო“ და „ეროვნულ-დემოკრატიული პარტია“ შედეგების გასაცნობად NDI-ს ოფისში ორშაბათისთვის არიან დაბარებული. „ლეიბორისტული პარტიის“ განცხადებით კი, მათთან ჯერ არავის დაურეკავს და, შესაბამისად, ისიც არ იციან, კვლევის შედეგებს საერთოდ მიიღებენ თუ არა. კვლევის შედეგები არ მიუღია არც „დემოკრატიულ მოძრაობა – ერთიან საქართველოს“.
შეგახსენებთ, რომ NDI-მ 2011 წლის 4-17 მარტს ჩატარებულ საზოგადოებრივი აზრის კვლევასთან ერთად საქართველოში არსებული წამყვანი პოლიტიკური პარტიების რეიტინგის კვლევაც ჩაატარა.

„დემოკრატიული მოძრაობა – ერთიანი საქართველოს“ ლიდერ ნინო ბურჯანაძეს საერთაშორისო ორგანიზაცია NDI-ს მიერ საქართველოში ჩატარებული საზოგადოებრივი აზრის კვლევის შედეგი, რომლის თანახმადაც, მმართველ გუნდს გამოკითხულთა 52 პროცენტი ენდობა, არარეალურად მიაჩნია.

როგორც პარლამენტის ყოფილმა თავმჯდომარემ გაზეთ „პრაიმ-ტაიმის“ პრესკლუბში გამართულ პრესკონფერენციაზე განაცხადა, იმავე კვლევების მიხედვით გამოკითხულთა 44 პროცენტი ამბობს, რომ საქართველოში დემოკრატია არ არსებობს, ხოლო 17 პროცენტმა არ იცის, ცხოვრობს თუ არა დემოკრატიულ სახელმწიფოში. შესაბამისად, ამ მაჩვენებლებზე დაყრდნობით, შეუძლებელია, რომ გამოკითხულთა უმეტესობა მაინც „ნაციონალურ მოძრაობას“ უჭერდეს მხარს.