გუშინ, 4 აპრილს, უზენაესი სასამართლოს შენობასთან „წინააღმდეგობის მოძრაობის“ ორგანიზებით აქცია „მე(ც) პატიმარი ვარ!“ გაიმართა. აქცია პოლიციასთან დაპირისპირებაში მას შემდეგ გადაიზარდა, რაც აქციის მონაწილეებმა უზენაესი სასამართლოს შენობას კვერცხები დაუშინეს, შემდეგ კი სასამართლოს კართან გვირგვინი წარწერით – „დავტირით სასამართლოს“ ჩამოკიდეს. ინციდენტის დროს აქციის 10 მონაწილე დააკავეს.

„დევნილთა სამოქალაქო მოძრაობის“ წარმომადგენელ გენადი კეკელიას 25-დღიანი პატიმრობა შეეფარდა, ამავე მოძრაობის წევრ ირაკლი ციკოლიას კი – 20-დღიანი პატიმრობა. 20-დღიანი პატიმრობა შეეფარდა ექს-პრემიერ ზურაბ ნოღაიდელის ყოფილი თანაშემწის – ზვიად ხარებავას ძმას – გრიგოლ ხარებავას და „ქართული პარტიის“ წარმომადგენელს – დავით კოჩიევს. აფხაზეთის უზენაესი საბჭოს დეპუტატ ადა მარშანიას, „წინააღმდეგობის მოძრაობის“ წევრ შოთა გლურჯიძეს, „ქართული პარტიის“ წევრებს – ქეთევან გოგინაშვილსა და თენგიზ ღლონტს, „თავისუფალი დემოკრატების“ აქტივისტ გოჩა ჩხაიძესა და აქციის კიდევ ერთ მონაწილეს – მადონა გოგუას 400-400 ლარის ოდენობის ჯარიმის გადახდა დაეკისრათ.

გუშინდელ ინციდენტთან დაკავშირებით სპეციალური განცხადება გაავრცელა „წინააღმდეგობის მოძრაობამ“, რომელიც მიიჩნევს, რომ „მშვიდობიანი მომიტინგეების დარბევა-დაპატიმრება – ეს არის ხელისუფლების გამოწვევა, რომელიც მათ მიიღეს“. „არ იქნება უკანდახევა, ბრძოლა გაგრძელდება გამარჯვებამდე!“ – ნათქვამია განცხადებაში.