აქტუალური
ცხინვალის დე ფაქტო ხელისუფლებამ ე.წ. საზღვარი მთლიანად დაკეტა

 საქართველო, 28 თებერვალი, საქინფორმი. ოკუპირებული ცხინვალის რეგიონის დე ფაქტო ხელისუფლებამ დანარჩენ საქართველოსთან ე.წ. საზღვრის ბოლო ღია მონაკვეთიც დაკეტა.

დე ფაქტო უშიშროების საბჭოს განცხადებით, „სამხრეთ ოსეთის რესპუბლიკის ტერიტორიაზე კორონავირუსის აფეთქების აღსაკვეთად მიღებულია გადაწყვეტილება, განსაკუთრებულ მითითებამდე სრულად დაიკეტოს გამარტივებული გაშვების ყველა პუნქტი სამხრეთ ოსეთი-საქართველოს საზღვარზე“.

ამ დრომდე დე ფაქტო ხელისუფლებას გახსნილი ჰქონდა მხოლოდ ქარძმანის ე.წ. გამშვები პუნქტი, რომელიც ოკუპირებულ ცხინვალის რეგიონს დანარჩენ საქართველოსთან აკავშირებს საჩხერის მუნიციპალიტეტის გავლით.

2019 წლის შემოდომიდან დაკეტილია ახალგორის და ჯავის რაიონებთან მდებარე რაზდახანის და სინაგურის ე.წ. გამშვები პუნქტები. მათი ჩაკეტვა იყო დე ფაქტო ხელისუფლების ერთ-ერთი პასუხი ხაშურის მუნიციპალიტეტის სოფელ ჩორჩანასთან ქართული პოლიციის საგუშაგოს განთავსებაზე.