საქართველო, 13 თებერვალი, საქინფორმი. აფხაზეთის ე.წ. საპრეზიდენტო არჩევნებზე სამი კანდიდატი იყრის კენჭს. როგორც ე.წ. ცენტრალურ საარჩევნო კომისიაში განაცხადეს, კანდიდატების მიერ დოკუმენტების წარდგენის ვადა 11 თებერვალს ამოიწურა.

ე.წ. ცესკოში დოკუმენტები წარადგინეს: ოპოზიციის ლიდერმ, ასლან ბჟანიამ, ე.წ. ვიცე-პრემიერმა, ეკონომიკის დე-ფაქტო მინისტრმა ადგურ არძინბამ და ე.წ. შსს-ს ყოფილმა ხელმძღვანელმა ლეონიდ ძაფშბამ.

ე.წ. ცესკოში დოკუმენტები არ წარუდგენია რაულ ხაჯიმბას, რომელმაც დე-ფაქტო პრეზიდენტის პოსტი საპროტესტო გამოსვლების ფონზე დატოვა.

რეგიონში ე.წ. არჩევნები 22 მარტს არის დაგეგმილი. აფხაზეთში ე.წ. განმეორებითი არჩევნები მას შემდეგ დაინიშნა, რაც ე.წ. უზენაესმა სასამართლომ 8 სექტემბერს გამართული „არჩევნების“ მეორე ტურის შედეგები გააუქმა.