უცხოეთი
„ფორბსის“ მონაცემებით, მსოფლიოს უმდიდრესი ადამიანი ბერნარ არნოა

 საქართველო, 20 იანვარი, საქინფორმი. „ფორბსის“ მონაცემებით, მსოფლიოს უმდიდრესი ადამიანი ფრანგული კომპანია LVMH–ს მფლობელი ბერნარ არნოა. გამოცემა „ფორბსის“ ცნობით, არნოების ოჯახი 2020 წლის 18 იანვრის მონაცემებით 116.5 მილიარდ აშშ დოლარს ფლობს. LVMH ისეთ ბრენდებსა და კომპანიებს აერთიანებს, როგორიცაა „კრისტიან დიორი“, „ლუი ვიტონი“, „ჟივანში“, „გერლენი“, „მოე & შანდონი“.

„ფორბსის“ უმდიდრეს ადამიანთა რეიტინგში მეორე ადგილს კომპანია „ამაზონის“ დამფუძნებელი ჯეფ ბეზოსი იკავებს, რომელმაც წელს პირველი ადგილი ბერნარ არნოს დაუთმო. მისი ქონება 115.6 მილიარდ აშშ დოლარს შეადგენს.

მესამე ადგილზეა კომპანია „მაიკროსოფტის“ დამფუძნებელი ბილ გეითსი, რომლის ქონებაც 110.6 მილიარდი აშშ დოლარია.

რეიტინგში მეხუთე ადგილზეა სოციალურ ქსელ „ფეისბუქის“ დამფუძნებელი მარკ ცუკერბერგი. მისი ქონების ჯამური ღირებულება 82.2 მილიარდ აშშ დოლარს შეადგენს.

აღსანიშნავია, რომ 2020 წელს მსოფლიოს 2 200 მილიარდერი ჰყავს.

რეიტინგში, ერთადერთი ქართველი – 447-ე ადგილზე, ბიძინა ივანიშვილია. მისი ქონება 4.9 მილიარდ დოლარადაა შეფასებული.

1tv.ge