პოლიტიკა
საქინფორმი: NDI-მ „შური იძია“ ივანიშვილზე უნდობლობის გამო და სასურველი სურათი დახატა

 საქართველო, 17 იანვარი, საქინფორმი. პოლიტიკოსებისადმი დადებითი დამოკიდებულების რეიტინგში „ევროპული საქართველოს“ ლიდერი დავით ბაქრაძე და დედაქალაქის მერი კახა კალაძე ლიდერობენ.

ეროვნულ-დემოკრატიული ინსტიტუტის (NDI) კვლევის მიხედვით, „ევროპული საქართველოს“ ლიდერ დავით ბაქრაძეს 34 პროცენტი დადებითად აფასებს, 22 კი, უარყოფითად.

ამავე გამოკითხვის მიხედვით, გამოკითხულთა 34 პროცენტი კახა კალაძის საქმიანობას დადებითად აფასებს, 22 პროცენტი უარყოფითად.

კვლევის თანახმად, „ლეიბორისტული პარტიის“ ლიდერს, შალვა ნათელაშვილი დადებითად აფასებს 29 პროცენტი, ხოლო 25 პროცენტი უარყოფითად.

გამოკითხულთა 27 პროცენტი საქართველოს პრემიერ-მინისტრს, გიორგი გახარიას დადებითად აფასებს, 34 პროცენტი კი, უარყოფითად.

პარლამენტის ყოფილ ვიცე-სპიკერს, თამარ ჩუგოშვილს გამოკითხულთა 12 პროცენტი დადებითად აფასებს, ხოლოდ 20 პროცენტი უარყოფითად.

კვლევის მიხედვით, საქართველოს ყოფილ პრეზიდენტ მიხეილ სააკაშვილს 26 პროცენტი დადებითად აფასებს, 39 პროცენტი უარყოფითად.

საქართველოს პარლამენტის თავმჯდომარე არჩილ თალაკვაძეს 16 პროცენტი დადებითად აფასებს, 32 პროცენტი უარყოფითად.

კვლევის მიხედვით, „ნაციონალური მოძრაობის“ თავმჯდომარე გრიგოლ ვაშაძეს 20 პროცენტი დადებითად აფასებს, 38 პროცენტი კი, უარყოფითად.

პარტია „ქართული ოცნების“ თავმჯდომარე ბიძინა ივანიშვილს გამოკითხულთა 17 პროცენტი დადებითად აფასებს, 49 პროცენტი უარყოფითად.

გამოკითხვის თანახმად, საქართველოს პრეზიდენტ სალომე ზურაბიშვილს 13 პროცენტი დადებითად აფასებს, 49 პროცენტი უარყოფითად.

საქართველოს პრეზიდენტ სალომე ზურაბიშვილის საქმიანობას გამოკითხულთა 8 პროცენტი კარგად აფასებს, 31 პროცენტი საშუალოდ, 34 პროცენტი კი ცუდად.

კვლევის საველე სამუშაოები ჩატარდა 2019 წლის 19 ნოემბერი-13 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 2,180 პირისპირ ინტერვიუს წარმომადგენლობითი შერჩევის საფუძველზე.

NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC-საქართველო. გამოკითხვის საშუალო ცდომილების ზღვარი +/- 1.9 პროცენტია.

P.S. იმ საყოველთაოდ ცნობილი ფაქტის გათვალისწინებითაც კი, რომ NDI-ისა და საქართველოში მისი პარტნიორების ყველა სოცგამოკითხვა წარმოადგენდა დაკვეთილ მოდელირებულ სურათს, რომლის ხილვაც აქ სურთ ცნობილ დასავლურ ორგანიზაციებს, ისინი პოლიტიკოსებისა და ექსპერტების დიდი ინტერესის საგანს წარმოადგენს. მაგალითად, ზემომოყვანილი ინფორმაცია მოწმობს, რომ: 1 – NDI-მ ანგარიში გაუსწორა ბიძინა ივანიშვილს, რომელმაც თავის ბოლო ინტერვიუში ორგანიზაციის სოცკვლევები ანგაჟირებაში დაადანაშაულა და ამის შესახებ საჩივარი აშშ-ის კონგრესსაც მისწერა; 2 — NDI-მ შექმნა საზოგადოებრივი აზრი, რომ 2020 წლის საპარლამენტო არჩევნების შედეგად ხელისუფლებაში მოვლენ არა მთავარი ძალები - მეტოქეები, ანუ ივანიშვილის „ქართული ოცნება“ და სააკაშვილის „ნაციონალური მოძრაობა“, არამედ დღეს „მეორე როლის“ შემსრულებლები, ანუ დედაქალაქის მერი კალაძე, რომელიც პოპულარობით სარგებლობს, იმ პირობით, რომ შექმნის საკუთარ პარტიას, და „ნაცმოძრაობის“ დანამატი - პარტია „ევროპული საქართველო“ და მისი ერთ-ერთი უსახური ლიდერი - პარლამენტის ყოფილი თავმჯდომარე, უკონფლიქტო ბაქრაძე.