საქართველო, 25 ივლისი, საქინფორმი. პროკურატურა „თიბისი ბანკის“ დამფუძნებლებს მამუკა ხაზარაძესა და ბადრი ჯაფარიძეს ბრალს წარუდგენს და მათთვის აღკვეთის ღონისძიების შეფარდების თაობაზე სასამართლოს მიმართავს, – ამის შესახებ გენერალურ პროკურატურაში გამართულ ბრიფინგზე პროკურორმა სალომე ჩიქობავამ განაცხადა.

პროკურატურის ცნობით, უწყებამ გამოიტანა დადგენილება მამუკა ხაზარაძისა და ბადრი ჯაფარიძის ბრალდების შესახებ.

„როგორც საზოგადოებისთვის ცნობილია, 2018 წლის 2 აგვისტოს საქართველოს გენერალურმა პროკურატურამ გამოძიება დაიწყო სს „თიბისი ბანკის“ სამეთვალყურეო საბჭოს თავმჯდომარისა და მოადგილის მიერ უკანონო შემოსავლის ლეგალიზაციის ფაქტზე.

მაღალი საჯარო ინტერესის გათვალისწინებით, გვსურს საზოგადოებას ვაცნობოთ, რომ სისხლის სამართლის საქმეზე მიმდინარე გამოძიების ფარგლებში მოპოვებული მტკიცებულებების ანალიზის შედეგად მიღებულია შემაჯამებელი გადაწყვეტილება.

გამოტანილია დადგენილება მამუკა ხაზარაძის და ბადრი ჯაფარიძის ბრალდების შესახებ, მათ მიერ, ჯგუფურად, 16 754 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის „ა“ და მე-3 ნაწილის „გ“ ქვეპუნქტით).

ასევე, გვსურს გაცნობოთ, რომ მამუკა ხაზარაძე და ბადრი ჯაფარიძე დღეს დაბარებულნი არიან საქართველოს გენერალურ პროკურატურაში მათთვის ბრალდების შესახებ დადგენილების წარდგენის მიზნით.

საქართველოს გენერალური პროკურატურა მ. ხაზარაძისა და ბ. ჯაფარიძისთვის ბრალის წარდგენის შემდეგ სასამართლოს მიმართავს შუამდგომლობით აღკვეთის ღონისძიების შეფარდების თაობაზე.

აღკვეთის ღონისძიების სახის შესახებ ინფორმაციას საზოგადოებას მივაწვდით დამატებით“, – განაცხადა პროკურორმა ბრიფინგზე.

საქართველოს მთავარმა პროკურატურამ უკანონო შემოსავლების ლეგალიზაციის ფაქტზე სისხლის სამართლის საქმის გამოძიება 2018 წლის 2 აგვისტოს დაიწყო. უწყების მიერ მიმდინარე წლის იანვარში გავრცელებული ინფორმაციით, გამოძიებით დადგენილია, რომ 2008 წლის აპრილში და მაისში, შპს „სამგორი თრეიდმა“ და შპს „სამგორი ემმა“, „თიბისი ბანკი“-სგან, სათანადო უზრუნველყოფის გარეშე, დაჩქარებული წესით მიიღეს საერთო ჯამში 17 მილიონ აშშ დოლარამდე სესხი. კომპანიების ანგარიშებზე სესხის თანხის განთავსებისთანავე, მამუკა ხაზარაძემ და ბადრი ჯაფარიძემ, ამავე კომპანიებიდან, როგორც ფიზიკურმა პირებმა, ისესხეს ზუსტად იმ ოდენობის თანხა, რაც „თიბისი ბანკმა“ საბრუნავი საშუალებების შევსების მიზნობრიობით ასესხა დასახელებულ კომპანიებს. 2008 წლის ბოლოს, „თიბისი ბანკმა“, აღნიშნული სესხები, საბანკო რეგულაციებით დადგენილ ვადაზე ადრე, დაუსაბუთებლად ჩამოწერა და გარე საბალანსო ანგარიშზე გადაიტანა, ხოლო 2012 წელს საერთოდ გაათავისუფლა ეს კომპანიები ბანკის წინაშე არსებული სასესხო ვალდებულებისგან, როდესაც დათანხმდა ამ ვალდებულებების ოფშორულ კომპანიაზე გადატანას. გარდა ამისა, პროკურატურის ინფორმაციით, დადგენილია, რომ მამუკა ხაზარაძესა და ბადრი ჯაფარიძეს არ გაუსტუმრებიათ შპს „სამგორი თრეიდისა“ და შპს „სამგორი ემის” ვალი. ამასთან, საქართველოს გენერალურ პროკურატურაში „თიბისი ბანკის“ საქმესთან დაკავშირებით განცხადება 28 თებერვალსაც გაკეთდა და საზოგადოებას უკანონო შემოსავლის ლეგალიზაციის ფაქტზე იმ ეტაპისთვის გამოძიების მიერ დადგენილი გარემოებები წარადგინა. განცხადების თანახმად, მიუხედავად იმისა, რომ „თიბისიმ“ „სამგორი თრეიდსა“ და „სამგორი ემ“-ზე გაცემულ სესხებს უიმედო კლასიფიკაცია მიანიჭა, ბანკი ამ კომპანიების დაკრედიტებას მაინც განაგრძობდა.

საქინფორმი კმაყოფილებით აღნიშნავს, რომ კანონმა ხაზარაძისა და მისი კომპანიონის მიმართ, დაგვიანებით, მაგრამ მაინც იზეიმა. გარდა, კონკრეტული, გენპროკურატურის განცხადებაში მითითებული სისხლის სამართლის დანაშაულისა, ხაზარაძე ცნობილია საქართველოში როგორც ბანკის მმართველი, რომელმაც მოსახლეობას დრაკონული პროცენტები დაუწესა კრედიტებზე. ბიძინა ივანიშვილს რომ არ გამოესყიდა მოქალაქეთა ვალები TBC-ბანკისგან, დღეს ასობით ათასი ადამიანი ქუჩაში იქნებოდა გამოძევებული თავიანთი ბინებიდან, რომლებიც აუქციონზე გაიყიდებოდა! კიდევ ხაზარაძე ცნობილია, როგორც აფერის ორგანიზატორი, სახელწოდებით „ანაკლიის კონსორციუმი“, რომელმაც უკვე მიაყენა სახელმწიფო ბიუჯეტს 300 მლნ დოლარის ზარალი, თუმცა პორტის მშენებლობა დაწყებულიც არ არის ინვესტორთა არარსებობის გამო. თუ ძიება შუა გზაში არ შეწყდება, კორუფციული კავშირები ხაზარაძიდან მივა გათავისუფლებულ პრემიერ კვირიკაშვილამდე, ჩრდილოვან საქმოსნამდე, გვარად ხუხაშვილამდე, რომელიც თავს ექსპერტს უწოდებს და ექს-ვიცეპრეზიდენტ ჯო ბაიდენამდეც კი, რის შესახებაც არაერთხელ აცნობა მკითხველს საქინფორმმა. კიდევ, ხაზარაძე ცნობილია იმით, რომ ახალგაზრდობაში, კომკავშირის ბელადად ყოფნისას, ხელი აწია საქართველოს ეროვნულ გმირზე მერაბ კოსტავაზე. ეს ფაქტი დაადგინეს პოპულარული და უძველესი ქართული ყოველკვირეული გაზეთი „ასავალ-დასავალის“ ჟურნალისტებმა, თუმცა ჟურნალისტური გამოძიება ძვირად დაუჯდათ. ხაზარაძემ და მისმა კომპანიონმა - პრემიერმა კვირიკაშვილმა ზეწოლა მოახდინეს სასამართლოზე, რომელმაც ჟურნალისტები დაავალდებულა, „მორალური ზარალისთვის“ ხაზარაძისთვის 5 ათასი ლარის ოდენობის კომპენსაცია გადაეხადათ, თუმცა რა მორალი უნდა ჰქონდეს მევახშეს?! ბოლო ხანებში ხაზარაძემ, რომელმაც დაასპონსორა ლგბტ და აქციები რუსთაველის პროსპექტზე და „საბას“ პრემიებით აჯილდოვებდა გარყვნილებს, რომლებიც რყვნიდნენ ახალგაზრდებს ბინძური ოპუსებით, ინცესტისა და ჰომოსექსუალიზმის პროპაგანდას რომ წარმოადგენდა, იგრძნო „მარყუჟი კისერზე“ და გადაწყვიტა, სასწრაფოდ პოლიტიკოსი გამხდარიყო. თუმცა, პარტიის შექმნა, რათა ყველაფერი „პოლიტიკური მოტივებით დევნისთვის“ მიეწერა, მევახშემ და კომბინატორმა, როგორც ხედავთ, ვერ მოასწრო...