აქტუალური
საქართველოს და სენტ-კიტსი და ნევისის ფედერაციას შორის სავიზო რეჟიმი უქმდება
საქართველო, 16 ივლისი, საქინფორმი. საქართველოს და სენტ-კიტსი და ნევისის ფედერაციას შორის სავიზო რეჟიმი უქმდება. შესაბამის შეთანხმებას ქართული მხრიდან გაერო-ში საქართველოს ელჩი კახა იმნაძე მოაწერს ხელს, რაზეც უფლებამოსილება მას პრემიერ-მინისტრმა, მამუკა ბახტაძემ მიანიჭა.
უვიზო რეჟიმით როგორც საქართველოს, ისე სენტ-კიტსი და ნევისის ფედერაციის მოქალაქეები ისარგებლებენ.
სენტ-კიტსი და ნევისის ფედერაცია (ასევე, ცნობილია როგორც სენტ-კრისტოფერის და ნევისის ფედერაცია) კარიბის ზღვის აღმოსავლეთ ნაწილში მდებარეობს. მისი მოსახლეობა დაახლოებით 55 ათასს შეადგენს.
აღსანიშნავია, რომ ფედერაციის მოქალაქეები საქართველოში უვიზოდ 2014 წლის სექტემბრამდე შემოდიოდნენ.
შინაგან საქმეთა სამინისტროს მონაცემებით, 2018 წელს საქართველოს სენტ-კიტსი და ნევისის 92 მოქალაქე ეწვია, 2019 წლის იანვარ-ივნისში კი, 35.
