პრეზიდენტის პრესსპიკერმა მანანა მანჯგალაძემ, პრეზიდენტის სახელით, იაპონიაში მომხდარი ტრაგედიის გამო მწუხარება გამოთქვა. როგორც მანჯგალაძემ დღევანდელ ბრიფინგზე განაცხადა, საქართველოს ხელისუფლება ცდილობს, იაპონელ ხალხს მოკრძალებული დახმარება გაუწიოს, რაც ქვეყანაში მაშველების გაგზავნითა და გარკვეული ჰუმანიტარული დახმარებით გამოიხატება.

„ჩვენ შეძრულები ვართ მომხდარით და ქედს ვიხრით იაპონელი ხალხის წინაშე. იშვიათობაა, ასე ღირსეულად შეხვდე განსაცდელს და ტრაგედიას, ასეთი სიმტკიცითა და ძალით გაუმკლავდე უბედურებას“, – განაცხადა მანჯგალაძემ.

ამასთან, პრეზიდენტის პრესსპიკერმა, ასევე, პრეზიდენტის სახელით, სამძიმარი გამოუცხადა ავღანეთში მომხდარი აფეთქებისას დაღუპული კაპრალის – ვალერი ვერსკიანის ოჯახს.

მანანა მანჯგალაძის განცხადებით, თითოეული ჯარისკაცის დაღუპვა საქართველოსთვის უდიდესი დანაკლისია.

მისივე თქმით, მსგავს შემთხვევებში, როგორც წესი, გადმოსვენებისა და დაკრძალვის ხარჯებს სახელმწიფო თავის თავზე იღებს.