პოლიტიკა
პრემიერი ბახტაძე: ჩვენ დავიცავთ ჩვენი მოქალაქეების ეკონომიკურ ინტერესებს

 საქართველო, 27 ივნისი, საქინფორმი. ჩვენ შევძელით, რომ საქართველოში ტურიზმი გახდა ერთ-ერთი ყველაზე სწრაფად მზარდი სექტორი, სადაც მოქალაქეების ძალიან დიდი ნაწილია დასაქმებული, იღებს შემოსავლებს, ჩვენი ამოცანა და ვალდებულებაა, დავიცვათ ჩვენი მოქალაქეების ეკონომიკური ინტერესები, – ასე უპასუხა საქართველოს პრემიერ-მინისტრმა მამუკა ბახტაძემ „მოამბის“ წამყვანის შეკითხვას რუსეთის ფედერაციის პრეზიდენტის მიერ გამოცემულ ბრძანებასთან დაკავშირებით.

მთავრობის მეთაურის შეფასებით, ტურიზმი საქართველოს ეკონომიკისა და მოქალაქეებისთვის ძალიან მნიშვნელოვანი სფეროა.

დღესაც მივიღე წერილი სასტუმროს მფლობელებისგან აჭარის რეგიონიდან, სადაც კონკრეტულად, თითოეული მათგანი გამოხატავს თავის ემოციებს, თავის შეხედულებას ამ საკითხთან დაკავშირებით. ჩვენ ვართ ქართული სახელმწიფოს ინტერესების და ჩვენი მოქალაქეების ეკონომიკური შემოსავლის დაცვის სადარაჯოზე. ეს არის ჩვენი ვალდებულება. აქედან გამომდინარე, რა თქმა უნდა, ჩვენ ყველაფერს გავაკეთებთ, რათა ეს პრობლემა მოკლე ვადაში იყოს დაძლეული. ამავე დროს, გავაგრძელებთ კიდევ უფრო ინტენსიურ პოლიტიკას, რომელიც გულისხმობს ჩვენი ეკონომიკის კონკურენტუნარიანობის კიდევ უფრო ამაღლებას“, – განაცხადა მამუკა ბახტაძემ.

პრემიერის განმარტებით, ტურიზმს, განსაკუთრებული ეკონომიკური დატვირთვის გარდა, მნიშვნელოვანი პოლიტიკური დატვირთვაც აქვს, ვინაიდან საქართველოს სტუმრებს საზღვარგარეთ ქვეყნის პოზიტიური იმიჯის განმტკიცებაში მნიშვნელოვანი წვლილი შეაქვთ.

როდესაც ჩვენ ვსაუბრობთ ტურისტებზე რუსეთიდან, ბუნებრივია, აქ ძალიან მნიშვნელოვანი კომპონენტი აქვს ხალხთაშორის ურთიერთობას. ის ხალხთაშორისი ურთიერთობები, რომელიც ტურიზმის სექტორის განვითარებამ გამოიწვია, ჩვენთვის ძალიან მნიშვნელოვანია. რუსეთიდან, ისევე როგორც სხვა ქვეყნებიდან ჩამოსული ტურისტები, საქართველოში სტუმრობის შემდეგ, რეალურად მონაწილეობენ საერთაშორისო ასპარეზზე ჩვენი ქვეყნის პოზიტიური იმიჯის განმტკიცებაში, რაც ძალიან მნიშვნელოვანია ჩვენთვის, საქართველოს წინაშე არსებული გამოწვევების გათვალისწინებით“, – აღნიშნა მთავრობის მეთაურმა.

როგორც მამუკა ბახტაძემ განაცხადა, ფრენების შეჩერების ოფიციალურ მიზეზად დასახელდა უსაფრთხოებასთან დაკავშირებული საკითხები, თუმცა საქართველო, როგორც სახელმწიფო და თბილისი, როგორც ქალაქი ტურისტებისთვის ევროპაში ყველაზე უსაფრთხო ადგილებია.

საქართველო არის ღია ქვეყანა. ჩვენ გვსურს მივიღოთ მეტი ტურისტი, მეტი ვიზიტორი. სტუმარ-მასპინძლობა გახლავთ ჩვენი ერთ-ერთი ყველაზე მთავარი ფასეულობა, რითაც თითოეული ჩვენთაგანი ამაყობს. ეს ჩვენი ეროვნული ინტერესების განუყოფელი ნაწილია. აქედან გამომდინარე, ჩვენ ძალიან პასუხისმგებლობითა და შედეგზე ორიენტებულად მივუდგებით ამ საკითხს”, – აღნიშნა პრემიერ-მინისტრმა.