საზოგადოება
ადმინისტრაციული ორგანოები უამრავ ინფორმაციას მალავენ

infoარასამთავრობო ორგანიზაცია „ინფორმაციის თავისუფლების განვითარების ინსტიტუტმა“ საჯარო ინფორმაციის გამოთხოვნასთან დაკავშირებით 5-თვიანი მუშაობის სტატისტიკური შედეგები გამოაქვეყნა. კვლევა მოიცავს 2010 წლის ოქტომბრიდან 2011 წლის თებერვლის ჩათვლით არსებულ მონაცემებს, რომელთა თანახმად, ორგანიზაციამ საჯარო ინფორმაციის მოთხოვნით ადმინისტრაციულ ორგანოებში 539 განცხადება გააგზავნა. პასუხი კი მხოლოდ 251 განცხადებაზეა მიღებული. მათგან სახელმწიფო ორგანოების მიერ სრულყოფილი ინფორმაცია მხოლოდ 178 შეკითხვაზე იქნა გაცემული; 73 განცხადებაზე – არასრულყოფილი; 261 მოთხოვნა დღემდე უპასუხოდაა დარჩენილი, ხოლო წერილობითი უარი ინფორმაციის გაცემაზე „ინფორმაციის თავისუფლების განვითარების ინსტიტუტს“ ეცნობა მხოლოდ 27 შემთხვევაში.

ანგარიშის თანახმად, პრაქტიკამ ცხადყო, რომ საჯარო დაწესებულებების მხრიდან ინფორმაციის მოწოდების ვადებიც ხშირ შემთხვევაში ირღვევა. გაგზავნილ განცხადებებზე დადგენილი ვადის დაცვით ინსტიტუტმა მხოლოდ 119 პასუხი მიიღო, 159 პასუხი – ვადის დარღვევით. ზოგადი ადმინისტრაციული კოდექსით დადგენილი ინფორმაციის მოწოდების ათდღიანი ვადა მხოლოდ ოთხმა უწყებამ დაიცვა.

„პრაქტიკაში, ასევე, ნათლად გამოიკვეთა, რომ, ზოგადად, საჯარო ინფორმაციის გაცემა კანონმდებლობით დადგენილ ვადებში გამარტივებულია მხოლოდ მაშინ, თუ გამოთხოვნილი ინფორმაცია არ ეხება საბიუჯეტო ფინანსების ხარჯვას. მაგალითისთვის, როდესაც ვითხოვდით კულტურული ღონისძიებებისა და განხორციელებული პროგრამების ან სახელმწიფო შესყიდვების ჩამონათვალს (მათი ღირებულების გარეშე), ან ვებგვერდების მომხმარებელთა რაოდენობას, ამ შინაარსის ინფორმაცია უფრო მაღალი მაჩვენებლით და ვადების დაცვით მოგვეწოდა. ადმინისტრაციული ორგანოების თანამდებობის პირთა ანაზღაურების, სამივლინებო ხარჯებისა და საპრემიო თანხების შესახებ გაგზავნილ განცხადებებზე მიღებული პასუხების მაჩვენებელი გაცილებით დაბალია. საკმაოდ ბევრია სრულიად რეაგირების გარეშე დარჩენილი პასუხები“, – აღნიშნულია ანგარიშში.

5-თვიანი მუშაობის შეჯამების შედეგად ყველაზე გაუმჭვირვალე და დახურული ადმინისტრაციული ორგანოები აღმოჩნდნენ პრეზიდენტის ადმინისტრაცია, განათლებისა და მეცნიერების სამინისტრო, ლტოლვილთა და განსახლების სამინისტრო, შინაგან საქმეთა სამინისტრო და თავდაცვის სამინისტრო.