საქართველო, 5 ივნისი, საქინფორმი. საქართველოში ტურისტული ვიზიტების რაოდენობამ მაისში 424 514 შეადგინა, რაც 64 770-ით მეტია 2018 წლის ანალოგიურ პერიოდთან შედარებით.

ინფორმაცია ეკონომიკისა და მდგრადი განვითარების სამინისტროს ტურიზმის ეროვნულ ადმინისტრაციას შინაგან საქმეთა სამინისტრომ მიაწოდა.

ტურიზმის ადმინისტრაციის ცნობით, მაისში საქართველოში საერთაშორისო მოგზაურთა 723 160 ვიზიტი შედგა,

ზრდა წინა წლის ანალოგიურ პერიოდთან შედარებით +14,2%-ია.

პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში საერთაშორისო ვიზიტორების ვიზიტების ზრდის კუთხით გამოირჩეოდნენ: გაერთიანებული სამეფო +48,2%, შვედეთი +31,2%, პოლონეთი +27,2%, გერმანია +26,4%, საფრანგეთი +26%, ნიდერლანდები +22,3%, და სხვა.

განსაკუთრებული ზრდა დაფიქსირდა შემდეგი ქვეყნებიდან: ყირგიზეთი +135,4%, უზბეკეთი +90,5%, ყაზახეთი +84,6%, ჩინეთი +56,4%, ბელარუსი +45,8%, აშშ +33,9% და სხვა.

2019 წლის იანვარ-მაისის პერიოდში საქართველოში საერთაშორისო მოგზაურების 2 988 478 ვიზიტი განხორციელდა, ზრდა წინა წლის ანალოგიურ პერიოდთან შედარებით +5,4%-ია.

ტურისტული ვიზიტების რაოდენობამ 1 655 163 შეადგინა, რაც 121 378-ით მეტია 2018 წლის იანვარ-მაისის მაჩვენებელზე (ზრდა +7,9%).

წინასწარი მონაცემებით, 2019 წლის იანვარ-აპრილში შემოსავალი საერთაშორისო მოგზაურობიდან საქართველოში შეადგენს 856 მილიონ დოლარს (ზრდა +8,4%), რაც 66 მილიონით მეტია წინა წლის ანალოგიურ მაჩვენებელზე.

2019 წლის აპრილის მონაცემებით, შემოსავალი საერთაშორისო მოგზაურობიდან საქართველოში შეადგენს 277 მილიონ დოლარს (ზრდა +16,1%), რაც 38 მილიონით მეტია წინა წლის ანალოგიურ მაჩვენებელზე.

2018 წელს შემოსავალი საერთაშორისო მოგზაურობიდან საქართველოში შეადგენს 3,2 მილიარდ დოლარს (ზრდა +19,1%), რაც 518 მილიონით მეტია წინა წლის ანალოგიურ მაჩვენებელზე.