ლარის კურსის გამყარება სამომხმარებლო ფასებზე გავლენას ვერ ახდენს. მონეტარული პოლიტიკის გამკაცრების მიუხედავად, ინფლაციური პროცესების შეჩერება ვერ ხერხდება. წლის დასაწყისიდან ლარი დოლართან მიმართებაში 6%-ით გამყარდა, მაგრამ სურსათი 10 %-ით გაძვირდა. სპეციალისტთა აზრით, ლარის კურსის გამყარება არ არის ის მთავრი ღონისძიება, რაც ფასებზე ადეკვატურ გავლენას მოახდენს.

„ინფლაციური პროცესების შეჩერება მხოლოდ კურსის გამყარებით არ მიიღწევა, ამისთვის მთავარი წინაპირობა ფულის მასის შემცირება და ანტიმონოპოლიური ღონისძიებების გატარებაა. გარდა ამისა, ფასების ზრდაზე გავლენას ახდენს მსოფლიო ბაზარზე არსებული ვითარებაც. აქედან გამომდინარე, რთულია იმის პროგნოზი, რამდენადაა შესაძლებელი ფასების დაჭერა და ამ მხრივ გარკვეული სტაბილურობის შენარჩუნება“, – განუცხადა საქინფორმს მონაცემთა ანალიზისა და განვითარების ცენტრის კონსულტანტმა ნოდარ კაპანაძემ.