აქტუალური
ვინც პანკისში ჰესის მშენებლობის მომხრე იყო, ახლა ისიც დუმს, რადგან საკითხი ასე დადგა: ვინც ჰესების მშენებლობის მომხრეა, ის ხალხის მტერია! - ხასო ხანგოშვილი

 საქართველო, 23 აპრილი, საქინფორმი. უხუცესთა საბჭოს თავმჯდომარე ხასო ხანგოშვილი დარწმუნებულია, რომ პანკისის ხეობაში განვითარებული მოვლენების შემდეგ იქ ჰესები აღარ აშენდება.

როგორც ხასო ხანგოშვილი „ინტერპრესნიუსთან“ განმარტავს, შინაგან საქმეთა მინისტრმა გიორგი გახარიამ, შეხვედრის შემდეგ გაკეთებული განცხადებით, რომ პანკისში ჰესები მაშინ აშენდებოდა, თუკი მშენებლობის მომხრე მოსახლეობის 90% იქნებოდა, საკითხი დახურა, ამიტომ პროტესტის გაგრძელების საჭიროება აღარ დგას.

თავისთავად ცხადია, ბატონმა მინისტრმა ამით დახურა ეს საკითხი, იმიტომ რომ 90% ხეობაში ჰესის მშენებლობის მომხრე არ იქნება და მე ვფიქრობ, რომ ეს საკითხი უკვე დახურულია. განვითარებული პროცესების შემდეგ ჰესების მშენებლობის მომხრეთა რიცხვიც მნიშვნელოვნად შემცირდება. მე ვფიქრობ, რომ ჰესის მშენებლობას აღარც განაახლებენ. ჩემთვის ნათელი გახდა, რომ დიდზე დიდი უმრავლესობა წინააღმდეგია და ვინც მომხრე იყო ჰესის მშენებლობის, ისიც დუმს, იმიტომ რომ ასე დადგა საკითხი, რომ ვინც ჰესების მშენებლობის მომხრეა, ის ხალხის მტერია. ამიტომაც მე დარწმუნებული ვარ, რომ ეს საკითხი დახურულია“, - განაცხადა ხანგოშვილმა.

შეკითხვაზე, იზიარებს თუ არა საქართველოს ენერგეტიკის განვითარების ფონდის ხელმძღვანელის აზრს, რომ ჰესის მშენებლობა ქვეყნის ენერგოუსაფრთხოებისთვისაა საჭირო, ხასო ხანგოშვილი ამბობს, რომ დიახ, იზიარებს.

დიახ, რა თქმა უნდა, ვიზიარებ ამ აზრს. მე ყოველთვის ამას ვამბობდი, რომ სახელმწიფოს განვითარების, ეკონომიკური წინსვლის წყაროა ელექტროენერგია და თუკი სახელმწიფო ელექტროფიკაციის გზას დაადგა, რომ ჩვენ დამოუკიდებლები ვიყოთ და ენერგია არ ვიყიდოთ, თუნდაც მტრული სახელმწიფოსგან, თავისთავად ცხადია, ეს აუცილებელია, მაგრამ მოხდა ის, რაც მოხდა და ამას ვერ გაექცევი“, - აღნიშნა ხასო ხანგოშვილმა „ინტერპრესნიუსთან“ საუბრისას.